Pelşîn Çetînkaya

 

SÊRT - Cinîyî vera sîstemê serdest ke hetê camêrdî ra yeno rayîr ra berdiş, 8ê Adare pêşwazî kenê. Cinîyê Sêrtî ajansê ma rê qisey kerdî û venga herikîyayîşê raşteyan kerdî. 

 

Cinîyê ke her raşteyî de vera zîhnîyetê serdest ê camêrdî de têkoşîn kenê, bi serkewtişê xo hema dinya de serkêşîya têkoşînê azadîye kenê. Cinî bi sloganê xo yê newîye raşteyan pir kenê û 8ê Adare Roja Cinîyanê Dinya de do raşteyan de bê. Cinîyê Sêrtî ajansê ma rê qisey kerdî û venga tewrbîyayîşê raşteyan kerdî 

 

Aktîvîsta Têgêrayîşê Cinîyê Azade (TJA) Cemîle Altane da zanayîş ke 10 rojî verê 8ê Adare dest bi xebatan kerdî û tax bi taxe, keye bi keye xebate rayîr ra benê. 

 

Cemîleye da zanayîş ke pêvînayîşan de muhîmîya 8ê Adare û polîtîkayê şerê taybet qisey kenê û vat: "Vera hêrişanê îqtîdarî de raşteyê cinîyan senî yeno tengkerdiş, munaqaşa kenê. Dima ra ma derheqê ‘tedbîrê ke senî eşkîyeno vernîya nê hêrişan bêro girewtiş’ qisey kenê. Hedefê polîtîkayê şerî de cinî est a. Coka ra ganî cinî her raşteyî de cayê xo bigêra. Ma 8ê Adare de saet 13.00î de Raşteyê Gureşî de do buroyê weçînayîşî yê cinîyan akerê û heme cinîyan pawenê pîrozbahîyê tîya.”

 

‘Ganî cinî biherikîyê raşteyan’ 

 

Nezahat Yardime zî ard ziwan ke ganî cinî binê tedaye ra bixelesa û wina dewam kerd: “Ganî cinî azad biba. Ganî vernîya xebatê înan nêro girewtiş. 8ê Adare de ma do pîya biherikîyê raşteyan û govende bigîrê. Ma nêwazenê cinî bêra qetilkerdiş, vengê înan bêro birnayîş. Ganî cinî xurt biba. Her raşteyî de ca bigêra.” 

 

‘Kesêk nêeşkeno asmenê ma bigêro’ 

 

Cinîya bi nameyê Emîneye zî da zanayîş ke kesêk nêeşkeno asmenê cinîyan bigêro, do ser bikewê û wina dewam kerd: “Yewine waştişê ma heqê ma yo.” 

 

Cinîya bi nameyê Fatoşe zî wina vat: “Ma nêeşkenê bi asanî bivejê raşteyan. Ganî cinî biveja raşteyan û raşteyan de xebat bikera. Nêtêduştîya cinî û camêrdî yena ciwîyayîş. Ganî no raşte ra bêro wedaritiş. Ez roja cinîyan heme cinîyan rê pîroz kena.”