Rabîa Onver

 

COLEMÊRG - Cinîyê Colemêrgî weçînayîşê herêmî ra ver qisey kerdî û vatî ke do rayê xo bidê DEM Partî û wina vatî: “Semedo ke DEM Partî cinîyan pawena û cinîyan rê serkêşîye kena ma do rayê xo bidê ci.” 

 

Weçînayîşê herêmî ke do 31ê Adare de pê bêro rê demêk kilm mend. Colemêrg û qezayê ci do 31ê Adare de 195 hezar û 815 kes 658 sindoqî de rayê xo bierzê. DEM Partî weçînayîşê 2023yî de serkewtişêk pîl dest fînabî û qerardaro ke nê weçînayîşî de zî bidest bifîno. Cinîyê Colemêrgî ajansê ma rê qisey kerdî û dîyar kerdî ke vera qeyûman û kayê AKPyî de do rayê xo bidî DEM Partî. 

 

‘Seba ma çîyo esas DEM Partî yo’ 

 

Kevser Kayaye da zanayîş ke bi serran o raya xo dana DEM Partî û wina vat: “Rayê ma DEM Partî re yo. Partîyê bînî se kenê wa bikerê, tîya herra ma ya. Tu kesêk nêeşkeno wareyê kurdan bigêro. Ma do ser bikewê. Partîyê bînî nêeşkenê ma bi hetkarî û pereyan bixapênê. Ma do 31ê Adare de bierşawê. Partîyê bînî cinîyan erzenê planê peynî. DEM Partî muhîmî dana cinîyan. Coka ra ma vanê DEM Partî.” 

 

‘DEM Partî seba cinîyan azadî îfade kena’ 

 

Rejîn Sonmez dîyar kerd ke sey cinîyêke Colemêrgî do rayê xo bida DEM Partî û wina dewam kerd: “Cayê ke kurdî tede ciwîyenê de ganî DEM Partî ser bikewa. Ameyoxê ma cinîyan destê DEM Partî de yo. DEM Partî azadîya ma cinîyan îfade kena. Partîyê bînî pey menfîetê xo de yê. DEM Partî heme şaran fikirîyena.” 

 

Cinîya bi nameyê Alîye Keskîne zî vat do rayê xo bida xo û vat ke partîya înan seba şarî xebatê başî rayîr ra bena.

 

‘Rayê ma DEM Partî rê yê’ 

 

Melek Kayaye zî wina vat: “Ganî merdim eslê xo vîra nêkero. Rayê ma DEM Partî rê yê. Merdim qet eslê xo vîra nêkero. Ma sey şarê Colemêrgî her tim pey DEM Partî de yê. Qeyûman seba ma tu çîyêk nêkerdî. Wexto ke şar şino sindoqan ser wa DEM Partî xo vîra nêkero.”

 

‘Ma kişta DEM Partî de yê’ 

 

Hanîfe Kanate zî ard ziwan ke ziwanê înan kurdî yo û partîya înan zî DEM Partî ya û vat ke aye paştîdayîş dana DEM Partî. 

 

Mahîde Kayaye zî dîyar kerd ke bê şert û mec rayê xo danê DEM Partî û wina qiseykerdişê xo peynî kerd: “Ma cinîyî rayê xo danê partîya xo. Beyraqa ke ziwanê ma pawena DEM Partî ya. Çîyo muhîm zî ma kurd ê û rayê xo danê DEM Partî. Hemşaredar kam beno wa bibo. Ma nêewnenê aye. Do Colemêrg de DEM Partî ser bikewo. Ma do her tim kişta partîya xo de bê.”