Rozerîn Gultekîn

 

AMED - Avûkatê ke Delegasyonê Huqûqnasê Mîyanneteweyî yê vera tecrîdî de ca gênê, dîyar kerdî ke tecrîd metodê îşkenceyî yo û seba tecrîd wedarîyo do xebatê polîtîkî bikerê. 

 

Rayberê PKKyî Abdullah Ocalan 26 serrî yo binê tecrîdêk giran de yeno tepiştiş û 35 aşmî yo tu xeberêke ci ra nîna girewtiş. “Delegasyonê Mîyanneteweyî yê vera tecrîd û seba çareserîya problemê kurdî” ke 12 avûkatanê Swêd, Başûrê Afrîkayê, Ispanya, Îtalya û Norveçî ra pê yeno, vera tecrîdî de mabenê 28-29ê Sibate de Amed de zîyaretan pê ard. Heyet 1ê Adare de bi temsîlkarê komelê sivîl û avûkatê Baroyê Huqûqî yê Asrinî yê Stenbolî reyde zîyaret pê ard û 2yê Adare de şûbeyê OHDyî yê Beyogluyî yê Stenbolî de otelêk de konferansê "Vera sîyasetê tecrîdî de têkoşînê aştî û azadîye" pê ard. 

 

Avukate û endama Merkezê Taqîpkerdişê Heqanê Merdiman a ke Galîçya ya herêma Baskî ya Îspanya ra ameya Raquel Crespo Castro û endama International Commission of Jurists a Swîsre (Komîsyonê Huqûqnasê Mîyanneteweyî) avûkate Jasmîn Sazvara ke heyet de ca girewtêne derheqê tecrîdî qisey kerd û qalê xebatê ke do agêrayîş de bikerê kerd.

 

 ‘No têkoşîn tenê berpirsîyarîya kurdan nîyo’ 

 

Endama Merkezê Taqîpkerdişê Heqanê Merdiman Raquel Crespo Castroye da zanayîş ke tecrîd binê standardê mîyanneteweyî de yo û vat: “Goreyê metodê Mandela merdimêk 15 rojî ra zêde binê tecrîdî de bimano no işkence yo. No gamêk seba vernîgirewtişê rêxistina komelkî yê vera hukmatî yo. CPT Îmraliyî zîyaret nêkeno û raporê xo eşkera nêkeno. No nîno qebûlkerdiş. No mojneno ke organîzasyon nêxebetîyeno. Rewşa bîyaye ya Tirkîya tecrîd nimuneyêk paradîgmatîk teşkîl keno. Tena seba Tirkîya nê seba heme raşteyê mîyanneteweyî yo. Problemê edaletî tena Tirkîya eleqedar nêkeno. Bi qaseyo ke Fîlîstînî reyde eleqedarbîyayîş est o, ganî problemê Kurdistanî reyde zî eleqedarbîyayîş bibo. Ganî bi binpaykerdişê heqan reyde eleqedar bibê. Ganî sîstemê heqê merdiman hîna aktîf bibo. Qerarê seba pawitişê heqanê merdiman ameyî girewtiş, ganî serê kaxidî de nêmanê. Ganî gamê aktîf bêrê eştiş. Ewropa tîya de berpirsîyar o. Ganî ma nê çîyî bîyarê ziwan. No tenê berpirsîyarîyê kurdan nîyo.”

 

‘Çapemenîya Ewropa Tirkîya sey cayêk turîstîk mojnena’ 

 

Raquele dewamê qiseykerdişê xo de wina vat: “Çapemenîya Ewropa Tirkîya sey cayêk turîstîk mojnena. Kurdistan de heme têgêrayîşê polîtîkî, femînîst û sivîl yenê krîmînalîzekerdiş. Hetê hukmatî ra ma binpaykerdişê cidî yê heqan dî. Îşkenceyê hemverê tepişteyan û keyeyan nîno dîyîş. Wexto ke ez agêra Galîçyaye ez do înan pare bikera. Ganî hukmatê ma tedaya polîtîk bi hukmatê Erdoganî bikero. Çîyo ke ewil ganî bêro kerdiş şikitişê tecrîdî yo û serbest verdayîşê tepişteyê sîyasî yo.”

 

 ‘Tecrîd metodê îşkenceyî yo’ 

 

Endama Komîsyonê Huqûqnasê Mîyanneteweyî û avûkate Jasmîn Sazvare zî da zanayîş ke bi delegasyonî reyde ameya herême û binpaykerdişê heqan taqîp kerda. Jasmîne wina qiseykerdişê xo dewam kerd: “Tecrîd problemêk muhîm o. Problemê kurdan ê ke yenê zanayîş ra hîna zêde yê. Tecrîd metodê îşkenceyî yo û sere weşî û psîkolojîyê merdiman de tesîr keno. Ez tecrîdî sey metodê îşkenceyî pênase kena. Netîceyê pozîtîf çin o. Ma dî ke têkoşînê kurdî çend heqdar o. Dayîkê Nobeta Edaletî mi xeylê hîsîn kerdî. Ma do sey heyet do raporê xo amade bikerê. Dima ke agêra ez do înan şarê Swêdî rê vaja.”