Oznûr Deger

 

RIHA - Namzeta hemşaredarîya DEM Partî ya Rihaye Gulşen Ozere wina vat: “Şaredarî ya cinîyan a, a şarî ya û a ciwanan a. Ma do bajarê xo pîya esasê fikrê ciwan û cinîyan de newe ra awan bikerê.” 

 

Weçînayîşê herêmî yê 31ê Adare rê demêk kilm mend û partîyê sîyasî xebatê xo bêmaben rayîr ra benê. Texrîbatê qeyûman ê Kurdistanî roj bi roje vejîyenê raşte. Şaredarîyê qeyûmî ke tu xizmetê înan şarî rê çin o, hetê şarî ra reaksîyonê pîlî reyde rî bi rî manenê. 

 

Şaredarîya Bajarê Pîl a Rihaye 20 serrî yo destê AKPyî de ya. Weçînitoxê Rihaye dîyar kerdî ke do vengê xo nêdê AKPyî ke şarî tu xizmetêke nêkerdo. Namzetê Partîya Têduştîye û Demokrasîyî yê Şaran (DEM Partî) yê Riha Gulşen Ozer û Celaledîn Erkmenî derheqê xebatê weçînayîşî ke rayîr ra benê de dîyar kenê ke do Rihayî pîya rayîr ra berê. 

 

Namzeta hemşaredarîye ya Riha ya DEM Partî Gulşen Ozere derheqê fehmê rayîrberîyê herêmî ke do awan bikerê de ercnayîş kerd.

 

 ‘Ma do bajar newe ra awan bikerê’ 

 

Gulşene dîyar kerd ke sey bajarê bînan Riha de zî şîdetê serê cinîye zêde bîyo û ganî rengê cinîye bêra awankerdiş. Gulşene wina vat: “Teda bi cinîyan yena kerdiş, cinî yena qetilkerdiş. Rengê û vatişê cinîyan tu cayêk de nîno dîyîş. Riha de projeyê cinîyan çinî yenê hesibnayîş. Projeyê cinîyan yan nîmcet manenê û yan zî nînê qebûlkerdiş. Ma zî seba vajê ‘şaredarî a cinîyan a, a şarî û ciwanan a’ xebetîyenê. Ma do bi fikrê hemparî bajar rayîr ra berê. Ma do bi cinî û ciwanan reyde awan bikerê.”

 

 ‘Ma do îmze nêerzê projeyê ke cinîyan nêvînenê’ 

 

Gulşene wina dewam kerd: “Taxan ra heta esnaf û heme dezgehan ma do her ca de bi reng û fikrê cinê newe ra awan bikerê. Ma do koperatîfê cinîyan virazê. Tîya herêma ramitiş û turîzmî ya. Ma do projeyê ke cinî serkêşîye ci rê kenê pê bîyarê. Ma do projeyê ke cinîyan nêvînenê îmze nêkerê.”

 

 ‘Bêrê ma şaredarîye pîya rayîr ra berê’ 

 

Gulşene nizdîbîyayîşê xo yê xebatan ercnaye û vat: “Ma şîyî bazarê Şîle û ma esnafan ziyaret kerd. Esnafê uca vatî şaredarîye ra nêeşkenê randevu bigîrê û waştişanê xo bîyarê ziwan. Vatî înan vere çiman de bigêrê, înan rê raşte nêameyo akerdiş û hetê ekonomîye de têk şîyê. Şar vano ke şaredarî tu xizmetêke înan rê nêkerda. Ma zî vanê ke do şaredarî biba şaredarîya şarî. Rihayijî vînenê ke 50 serrî yo bajar de xizmet nêameyo kerdiş. Ma vanê ke bêrê ma pîya şaredarî rayîr ra berê.” 

 

 Gulşen Ozere kam a? 

 

Gulşene serra 1965î de Amed de ameya dinya. Qismêk pîl ê cuya xo Amed de derbaz kerda. 12 serrî Riha de xebate rayîr ra berda. Awanbîyayîşê Komeleya Cinîyan a Yaşamevî ya Rihayî de ca girewta. 10 serran sey aktîvîste xebatê komeleye de ca girewta. Dima ke agêraya Amed zî xebatê cinîyan rayîr ra berda. 2015-2017î de hemserekatîya HDPyî ya Amedî kerd. Endamtîya PMyî kerd. Dima ra hemşaredarîya Bismilî kerd û qeyûm tayînê herinda aye ame kerdiş. Nika namzeta Rihayî ya.