Elfazî Toral

 

BEDLÎS - Ulfîye Ozcana ke pêroyê cuya xo de xeylê raşteyan de xebate rayîr ra berda wina vat: “Mi têkoşînê cinîyan ke açarîyayo têgêrayîşêk de ca girewt û têkoşînê xo pîl kerd. Tîya ra tepîya seba çîyê aîdê şarî biresna şarî ez do xizmet bikera.” 

 

Weçînayîşê herêmî yê 31ê Adare rê demêk kilm mend û Partîya Têduştîye û Demokrasîyî yê Şaran (DEM Partî) xebatê xo bêmaben rayîr ra bena. DEM Partî ke her kesî ra paştîdayîş gêna, xebatê xo vera heme şert û mercan dewam kena. Bedlîs û qezayanê ci de zî xebate bi coşêk pîl yenê kerdiş. Namzeta hemşaredarîye ya DEM Partî ya Norşînî Ulfîye Ozcane nê mesajî dana “Ma seba şarî tîya de yê. Ma do seba şarî bixebetê û berardiş bikerê.”

 

Ulfîye Ozcana ke bi eslê xo ra Norşînê hetê Tetwanî de yena dinya û uca de pîl bena. Mektebe mîyanên Mersîn de temam kena û meslekê pîyê xo vera mecbur manena bar bikerê xeylê bajaran. La Ulfîye têkilîya xo Bedlîs, Tetwan û Norşînî ra nêbirnena. Ulfîye wina vana: “Ewro Norşîn de ya û mi berpirsîyarî girewt. No seba mi erc û sereberzî yo.” Ulfîyeya ke beşê sosyolojî, muhasebe û rayîrberîyê herêmî wenda dîyar kena ke prosesê perwerdeyî ke dîya, wazena seba fêdeyê şarî bişuxilna. Ulfîye wina vat: “Mi xeylê raşteyan de têkoşîn kerd. Baskê cinîyan, ciwanan û têkoşînê cinîyan de. Mi xeylê dezgeh û komelayan de ca girewt. Nika zî bîya namzeta DEM Partî.”

 

 ‘Ma wazenê îradeyê xo tîya de bivînê’ 

 

Ulfîye da zanayîş ke sîstemê hemserekatî yê rayîrberîyê herêmî de serra 2014î de kewtî dewre û wina vat: “Nê demî de têkoşînê cinîyan tacîdar bî. Mi sey namzeta hemserekatîye berpisîyarî girewt. Ez do nê berpirsîyarîye bi hawayêkê tewr baş bîyara ca. Serra 2014 û 2019î de qeyûm ameyî tayînkerdiş. Çi heyfo ke îradeyê şarî ame xespkerdiş. No di demî yo ke qeyûm tayînê îradeyê şarî yenê kerdiş. No di demî yo ke Norşîn de zî wina yeno kerdiş. Şar nika seba îradeyê xo newe ra bigêro xîret keno. Şar wazeno îradeyê xo tîya de bivîno.” 

 

Do cinîyan reyde raşteyê newîye akerê 

 

Ulfîye dîyar kerd ke bi ameyîşê qeyûman reyde raşteyê cuye yê cinîyan ameyî çinîkerdiş û wina dewam kerd: “Bi ameyîşê qeyûman reyde destkewtişê cinîyan hedef ameyî girewtiş. Bi qeyûman reyde dezgehê cinîyan ameyî girewtiş. Ma do cinîyan rê raşteyê newîye awan bikerê. Do cinî nê raşteyan de xo azad îfade bikerê. Hedefê ma yê ewil; îradeyê şarî ke ameyo xespkerdiş tepîya bigîrê. Ma do çarçeweya paradîgmaya esas a partîya xo de şarî rê xizmet bikerê. Yewine partîya ke têduştîya cinsîyetî pawena partîya ma ya. Ma nê bi sîstemê hemserekatîye kenê û mojnenê.”

 

 ‘Ma do çîyê aîdê şarî biresnê şarî’ 

 

Ulfîye qiseykerdişê xo yê peyênan de da zanayîş ke tu raşteyêk de xebate nînê kerdiş û wina peynî kerd: “Qezaya Norşînî hema sey dewêke şenik a. Polîtîkayê ma yê esas no yo ke bi hawayêkê têduştî xebate seba heme şarî bikerê. Eynî wext de seba ma yê planê aver de cinî, ciwan, tutî û astengdar ê. Ma do çîyê aîdê şarî biresnê şarî. Ma seba şarî tîya de yê. Ma do seba şarî bixebityê, seba şarî berardiş bikerê.”