Rozerîn Gultekîn

 

AMED - Namzeta hemşaredarîya Hêne ya DEM Partîye Besîle Narîna ke dîyar kerd ke çîyo ke aye temam kerda partî ya û embazê aye yê. Besîleya ke 22 serrî yo têkoşîn kena wina vat: “Seba xo nê seba şarî seba komelî ma tîya de yê. Şaredarî ê şarî ya.” 

 

Xebatê weçînayîşî qezaya Hêne ya Amedî de bi coşêk pîl dewam kenê. Weçînayîşê 2014î de BDP se ra 45ê rayan girewt û şaredarî girewt. La 2016î de qeyûm tayînê şaredarîye ame kerdiş. serra 2019î de namzetê AKPyî ame weçînayîş. No 5 serrî yo qezaye de tu xizmetêke nêameyo kerdiş û 2024î de şar hema zî problemê rayîr û awe ciwîyeno. Namzeta hemşaredarîya qezaya Hêne ya Amedî ya DEM Partî Besîle Narîne vera probleman û xespkerdişê îradeyî de bî namzet. 

 

Besîle kam a? 

 

Besîle Palu ra ya. Keyeyê aye 55 serrî yo Amed de yo. Tutîya aye û ciwanîya aye Sûr de derbas benê. Besîle wina dewam kena: “Ê wextan heqê cinîyan ê qiseykerdişî çinî bî. Çîyo ke ma dayîka xo ra musayî, hepskerdişê keye bî. Rewşa nika û yê verê cu ra cîya ya. Ma xeylê çîyan da vernîya xo. Cuya ma pêro kesan de serê sifre de daxî cayê cinîye çinî bî. Nika heqê vatişî yê cinîyan o. Her raşteyê cuye de cepheye tewr vernî de yê. Wexto ke ez Sûr de bîya, mi têkoşînê kurdî nas kerd. Vedat Aydin ame qetilkerdiş. Prosesêk muhîm bî. Mi têkoşîn tîya de nas kerd. Dima ra ma bar kerd Baglarî. Çend embazê cinî ameyî keyeyê ma. Vatî ke ti se kena. Lajê mi şenik bî. Vatî kişta ma de bixebetî. Mi zî qebûl kerd.” 

 

‘Partî û embazê mi ez temam kerda’ 

 

Besîle qiseykerdişê xo de wina qalê tewrbîyayîşê xo yê karî kerd û vat: “Ma cinî bi hezaran serrî yo bar wedarnenê. No bar bi têkoşînî sivil beno. Wexto ke ez newe şîya partî serra 2002 bî. Prosesê zehmetin bî. Ewil ez komîsyonê taxe de xebetîyaya. Dima ra qezaya Peyasî de baskê cinîyan de xebetîyaya. Mi rayîrberîya partîya sîyasî kerd. Dimayê kongreyan mi Meclîsê Cinîyan ê Merkezî de ca girewt. Prosesê koperatîfê cinîyan ê Baglarî de mi xebate kerd. Serra 2013-201î de mi serekatîya koperatîfî kerd. Mabenê serra 2019-2020î de mi hemserekatîya HDPyî ya Peyasî kerd. No têgêrayîş ma xeylê aver berd. Ganî heme cinî ferqê hêzê xo de bê.” 

 

‘Ma şîyî her ca’ 

 

Besîle derheqê namzetîya xo ya Hêne de zî wina ercnayîş kerd: “Nizdîyê 60 dewî û mezrayî qezaye de est ê. Ma ameyî dewê Hêne de gêrayî. Xebatê ma est bî, la her ca de çinî bî. Yanî heta ke destê ma ra ame ma şîyî her ca. Ganî merdim biewno çimanê merdiman û sohbet bikero. Merdim zaf çî ciwîya la zerrîya înan de mend. Şar nêeşkeno probleman camêrdan rê vajo la bi asanî eşkeno cinîyan rê vajo. Merdiman goşdarî kenê.” 

 

Problemê Hêne 

 

Besîle bale ant serê probleme Hêne û vat: “Problemê binsesazîye est o. Yê rayîrî est o. Hema probleme awe est o. Hema zi cinî bi bîdonan awe ancenê. Problemê pakîye dorme de est o. Yê ceyranî est o. Şar tîya de amadekarîyê zimistanî kerdbî la çi heyf o ke xeylê cayan de heta yew aşme ceyran ame birnayîş. Heme kelepulê înan şîyî serê eşteyî. Problem zêde yê. Vera nê de projeyê ma est ê. Seba problemê awe dewan de projeyê ma est o. Ma bi şaredarîya pîlî reyde pare kerd. Ma do ewil bi şarî reyde qisey bikerê. Xebatê ma serê esasê cinî û ciwanan de yo. Tîya de ciwanî nêmendê. Her kes koçê Ewropa keno. Sebebê ci zî nêbîyayîşê karî yo. Keyeyî wazenê ma tîya de çîyêk bikerê. Hedefe ma no yo ke ma atolyeyêk tekstîlî yê 400-600 kesî akerê. Ma projeyê nê çîyî amade kerd. lazimîya cinî, ciwan û tutan bi raşteyê cuye est o. Xebatê resim, muzîk, spor û ziwanî do bêrê kerdiş.” 

 

DEM Partî eleqeyêk pîl vînena 

 

Besîle da zanayîş ke xebatê weçînayîşî weş derbaz benê û wina ard ziwan: “Ma agêrayîşê pozîtîf û weş gênê. Ma kombîyayîşê şarî pê anê. Kal û pîrî est ê. Mi vat werrekna cinî zî bibayêne. Çend cinî est bî la mi waştêne zêde bibayêne. Ma bawer kenê ke ma do ser bikewê. Lazimîya Hêneyî bi bedilnayîşî est o. No bedilnayîş zî bi cinî û ciwanan mumkun o. Ma do bi şarî reyde îmze bierzê projeyê weşan. Ma nê prosesî de paştîdayîşê şarê xo wazenê. Seba xo nê, seba şarî seba komelî ma tîya de yê.”