Nazlican Nûjîn Yildiz

 

ÎZMÎR - Ver bi weçînayîşê heremî reyde cinîyan waştişê xo ardî ziwan û dîyar kerdî ke çareserîya probleman DEM Partî de ya. Cinîyan da zanayîş ke semedo ke DEM Partî bi namzetê xo reyde kewena weçînayîş bi hêvî yê û do bi ser bikewê. 

 

Ver bi weçînayîşê herêmî ra cinî waştişanê xo anê ziwan. Bi taybetî cinîyê kurdî yê bajarê Tirkîya de ciwîyenê, hetê xoresnayîşê şaredarîyan de zehmetîyan ancenê. Cinîyê Torbali yê Îzmîrî waştişanê xo anê ziwan û dîyar kerdî ke semedo ke DEM Partî bajarê cîya yê Tirkîya de namzetî mojnayê kêfweş ê. Cinîyan da zanayîş ke ê şaredarîye ra xizmet wazenê û vatî ke do DEM Partî probleman çareser bikera. 

 

Sakîne Gorale dîyar kerd ke ganî rayîrberîyê herêmî paştîdayîş bido cinîyan û raşteyê îstîhdamî akero. Sakîneye wina dewam kerd: “Ma wazenê xo biresnê şaredarîyan. La ma nêeşkenê xo biresnê. Ma wazenê her tim kişta ma de bê. Tena wextê weçînayîşî de nê, her tim kişta ma de bibê. Kênaya mi mamosta ya la hîrê serrî yo nêxebetîyena. Vernîya ciwanan nêakenê. Her kes hetgirê xo keno kar. Nimûne sey AKPyî. Ganî şaredarî seba cinîyan îmkanê karî awan bikera. Heme çîyê ke dinya de yenê berardiş bi wesîleya cinîyan o. DEM Partî bi namzetê cinî reyde kewena weçînayîş. No xeylê pozîtîf o. DEM Partî her tim paştîdayîş dana cinîyan. Şina hetkarîya cinîyan. Mi nê çîyî sewbîna partîyêk bînî de nedî.” 

 

‘Ma partîyê bînan de timî camrêdan vînenê’ 

 

Songul Ale zî dîyar kerd ke ê şaredarîya ke xebetîyenê wazenê û ganî kreşê ke cinî eşkeno tutê xo tede ronê bibo. Songule dewamê qiseykerdişê xo de wina vat: “Ma wayîrê bawerîyî ke DEM Partî waştişanê ma bîyara ca. No seba ma xeylê muhîm o. Ma kêfweş ê. Ma partîyê bînan de her tim camêrdan vînenê. Sîstemê hemserekatîye de bîyayîşê cinîyan sereberzî yo. DEM Partî cinîyan fehm kena. Yewine partiya ke ca dana cinîye ya.” 

 

Semedê cinîyan waştişê îmkanê karî 

 

Nuran Yavuze zî vat aye kreşê ke cinî eşkenê tutanê xo tede ronê wazenê û wina ercnayîş kerd: “Xeylê probleme cinîyan est ê. Cinî fabrîqayan de pelçiqîyayî. Cinîyê ciwanî unîversîte qedênayî, lîse qedênayî la fabrîqayan de pelçiqîyayî. Ma îmkanê karî wazenê. Wa qursê ziwanê dayîke bibê. Wa tutê ma bi asanî qisey bikerê. Ma bi ziwanê xo eşkenê xo îfade bikerê. Semedo ke DEM Partî bi namzetê xo kewena weçînayîş ma kêfweş ê. Ma cinîyî çi destê ma ra bêro ma do bikerê. Ma zerrîwazî xebetîyenê. Ma do paştîdayîş bidê partîya xo. Ma cinî vengê xo bidê eşnawitiş.” 

 

Waştişê xizmetê bi ziwanê dayîke 

 

Bedrîye Gure zî ard ziwan ke ê şaredarîyan de bi ziwanê dayîke xebatan wazenê û wina vat: “Ma bi ziwanê kurdî xebatan wazenê. Ma bi îdîayî ke no bi DEM Partîye pê bêro. DEM Partî do herêman de seba paroblemê cinîyan biba çareserî. Ma bi ziwanê xo xizmet wazenê. Jin jiyan azadî.”

 

‘Ma do serbikewê’ 

 

Seher Urtekîne zî ercnayîşê xo de ard ziman û da zanayîş ke wexto ke şinê şaredarîye wazenê merdimê ke ziwanê înan ra fehm kenê, bibê û vat şaredarîyan de bi xeylê ziwanî açarnayîş est o la bi kurdî çin o. Sehere dîyar kerd ke partîya înan de hemserekatî est a û coka ra erco ke seba cinîye yeno dayîş xo dano nîşandayîş. Sehere vat ke ê partîya ke erc dana cinîyan tercîh kenê û do serbikewê.