Mîdye Miqted

 

ŞEHBA - Cinîyê Şehbayî tewrê çalakîyê 8ê Adare bîyî ardî ziwan ke ê tu wext sere hemverê zulmî de sere nêtewênenê û wina vat: "Ma do 8ê Adare de têkoşînê xo yê hemparî hîn zêde bikerê."

 

Kantonê Şehbayî de bi coşê cinîyanê xo 8ê Adare ame pêşwazîkerdiş. Cinîyê tewrê çalakîyê 8ê Adare bîyî dîyar kerdî ke ê 8ê Adare de xoverdayîşê xo newe kenê û vatî ê do her tim têkoşînê xo dewam bikerê. 

 

Emîna Mustefa Osman 8ê Adare temamê cinîyê dinya pîroz kerd û wina vat: "Ma do 8ê Adare Rayber Abdullah Ocalanî rê, tepişteyê zindanan ke nika grev de yê û temamê cinîyanê dinya pîroz kenê. Ma do 8ê Adare de têkoşînê xo yê hempar hîna zêde bikerê."

 

'Cinî têkoşînê xo pîlêr kenê'

 

Emîne veng da pêro cinîyan û vat: "Semedê temamê cinîyanê dinya ez veng dana ke ganî wurzê serê payan. Semedo ke xêrê nê rê cinîyê dinya ke binê zihniyetê dewletan de ciwîyayî, cuya înan roşn bî. Bi taybetî komelê kurdî de cinî ewro wayîrê xo vejîyenê. Cinîyan xo xelisnayî û her raşte de cayê xo girewtî. Xo mîyanê dinya de daya îspatkerdiş û ser ê fikrî û felsefeyî de ewro xo ver danê û tekoşînê xo pîlêr kenê."

 

'Ma do her tim 8ê Adare bi xoverdayîş pêşwazî bikerê'

 

Eynî wextî de zî cinîya bi nameyê Hemîde Omar Mihemed zî bale ant serê cinîyanê têkoşer û wina vat: "Ma na roje Rayberê Şarê Kurdî Abdullah Ocalanî rê pîroz kenê, pêro pakrewanê cinî yê sey Avesta Xabûr, Barîn Kobanê û bi hezaran sey înan ke xeta azadbîyayîşê cinîyan de xebate kerdê, pîroz kenê. Ma do her tim 8ê Adare bi xoverdayîş pêşwazî bikerê."

 

'Ma bi deyîranê xo 8ê Adare pîroz kerd'

 

Îdarekarîya TEV-ÇANDî ya kantonê Efrîn û Şehbayî Newroz Silêman da zanayîş ke înan bi deyîranê xo 8ê Adare pîroz kerdî û wina vat: “Ma na roje pêro cinîyanê kedkaran ê dinya rê pîroz kenê. Ma bi şahiya xo ya 8ê Adare bi coşê cinîyanê xoverdayoxan pîroz kerd. Sewbîna bernemeyê ma xeylêk dewlemend bî. Bi komê deyîranê Hîlala Zêrîn û TEV-ÇANDî bi wirdî ziwanê kurdkî û erebkî deyîranê xo pêşkêş kerd. Ma wina bi şarî reyde pare kerd û mîyan de komê deyîranê êzidîyan deyîranê xo pêşkêş kerd. Wina ma 8ê Adare pîroz kerd.”