Dîlan Babat

 

ŞIRNEX - Cinîyê Qilebanî dîyar kerdî ke do vera weçînitoxê kaçaxe de wayîrê îradeyê xo bivejê û vatî ke şaredarîya AKPyî tena merdimanê xo rê xebetîyena û wina vatî: “Ma do 31ê Adare de AKPyî bişirawê. Ma xo ra bawer ê û ma do ser bikewê.” 

 

Weçînayîşê herêmî yê 31ê Adare rê demêk kilm mend. Partîya Têduştîye û Demokrasîyî yê Şaran (DEM Partî) Şirnex de xebatê xo bêmaben rayîr ra bena. Şarê Qilebanî da zanayîş ke şaredarîya ke 5 serrî ya destê AKPyî de ya, înan rê nê, merdimanê xo rê xizmet kena û vatî ke vera weçînitoxê kaçaxe yê AKPyî de do wayîrê îradeyê xo bivejê, destûr nêdê xespkerdişê îradeyê înan. Sewbîna bajar de problemê rayîr, awe û parkan zî nînê çareserkerdiş û vera heme muracatan bê cewab yenê verdayîş. 

 

‘Ma do şaredarîyan destê AKPyî ra bigîrê’ 

 

Fecrîye Şengule da zanayîş ke aye wazena DEM Partî şaredarîye qezenc bikera û wina vat: “Zilmo ke AKPyî bi ma kerdo wa biqedîyo êdî. Tîya herra ma ya. Ma wazenê AKP tîya ra bivejîyo. Vera weçînitoxê kaçaxe de ganî her kes wayîrê îradeyê xo bivejîyo.” 

 

Azîme Gune zî ard ziwan ke şaredarîya AKPyî yew xizmetêke zî înan rê nêkerda û wina veng kerd: “Ganî ma wayîrê îradeyê xo bivejê. Ma do 31ê Adare de şaredarîye bigîrê.”

 

‘Ma nêwazenê zilm bivînê’ 

 

Narinç Unvere zî ercnayîşê xo wina ard ziwan: “Bi serran o AKP yew xizmetêke nêkerdo. Ma tena ameyî kiştiş. Ma wazenê ser bikewê. Ma zilm nêwazenê. Ma her tim yenê qetilkerdiş. Ma nêwazenê tutê ma bêrê qetilkerdiş. Ma do 31ê Adare de serê sindoqan de bê. Wa partîya ma qezenc bikera, ma çîyêk bîn nêwazenê.”

 

‘Ma do AKPyî bişirawê’ 

 

Kiymet Alturke zî dîyar kerd ke AKP 5 serrî yo tena merdimanê xo rê xebetîyeno û wina dewam kerd: “5 serrî yo xeylê sozî ameyî dayîş. La yew zî nêame ca. Tîya cayêk şenik o. Şaredarî girewtî û tena merdimanê xo rê xizmet kerdî. Ma wazenê no êdî wirzo. Ma wazenê şar bibo wayîrê vatiş. Ma wazenê cinî bibê wayîrê vatişî û hepsê keyeyî nêbê. Ma do 31ê Adare de AKPyî bişirawê.”

 

‘Problemê rayîrî nêame çareserkerdiş’ 

 

Helîn Ureke zî bale ant serê problemanê herême û wina vat: “Ma têduştîye wazenê. Ma sey cinîyê ciwanî xeylê probleman ciwîyenê. Bi serkewtişê DEM Partî do bajar de temsîlkarîya têduştîye pê bêra. Seba ciwanan yew raşteyêke nêame akerdiş. Yew sozêke nêame dayîş. Ez veng bi her kesî kena ke bi edalet têbigêrê.”