Gulîstan Gulmuş

 

DÊRSIM - Namzeta keyatîye ya taxa Sîhenkî ya Dêrsimî Perîhan Dalgiçe vat ke do hemwelatijê taxe rê biba çareserî û wina dewam kerd: “Keyatîya ke baskêke dewlete ya nika seqet a. Binêsazîyo ke ci rê vanê keyatî veng kerdî. Goreyê mi ganî ma mîyanê nê çîyî pirr bikerê.” 

 

Weçînayîşê herêmî rê demêk kilm mend û xebatê partîyê sîyasî yê bajaran dewam kenê. Dersim de taxa Sîhenkî de 16 namzetê keyatîye zî dest bi xebatê xo kerdî. Nê namzetan ra yew zî Perîhan Dalgiçe ya. Perîhane unîversîteya Munzurî de beşê sosyoloji qedênaya û serra 2016î de sosyolojî de lînsansê berzî kerda. Perîhane bi îdîaya ke sey sosyologêke bi şarî reyde têkilîyê baş awan bikera û problemê înan çareser bikera. 

 

Ewil do awanîyan kontrol bikera 

 

Perîhane problemê Sîhenkî da pêhesnayîş û derheqê rîskê erdlerzî de wina vat: “Problemê tewr pîl ê Sîhenkî koçberî, întîxar, destdergê û tersê erdlerzî yo. Erdlerzî vera şik est o. Şar wazeno awanî bêrê kontrolkerdiş. Ganî awanî bêrê kontrolkerdiş. Ma nêzanê awanî vera erdlerzêke 7-8î de çend xurt ê. Ez biba keya ewil ez do awanîyan bida kontrolkerdiş. Problemê bînî zî est ê. Yê dorme û heywanê raşteyî. Komel de problemê cidî yê dormeyî est ê.”

 

‘Dêrsim bê ciwan mendo’ 

 

Perîhane bale ant serê koçberîye û wina dewam kerd: “Demê peyênan de koçberî zaf zêde bîyo. Cinîyî xeylê probleman ciwîyenê. Nika Dêrsim bê ciwan mendo. Ez sey namzeta keyatîye vana ke ‘gelo ma senî eşkenê vernîya nê çîyî bigîrê’. Dima ke ez biba keya ganî ma nê problemê komelî komale û dezgehê selahîyetdarî rê biresnê. Ma do binê nê probleman ra wirzê. Sewbîna problemê cinîyan, şîdetê serê cinîyan tîya de zî problemêke pîl o. Dersim de zî her hetî ra şîdet serê cinîyan de yeno kerdiş. Cinî kewtî raşteyê selahîyetî, ma mabene mutbex û odeya rakewtişî de ameyî sînorkerdiş. Ganî no zîhnîyet bêro peynîkerdiş.”

 

‘Ma wazenê nê problemî çareser bikerê’ 

 

Perîhane da zanayîş ke ganî problemî bêrê çareserkerdiş û wina qiseykerdişê xo peynî kerd: “Sebebê koçberîye betalî yo. Sosyolojî zanîstê komelî yo. Bi komelî reyde eleqedarbîyayîş o. Ez problemê nê bajarî baş zana. Yew problemê ma yê pîl betalî yo. Betalîye vera her kes koç keno. Ganî ma vernîya nê çîyî bigîrê. Bi betalîye reyde întîxar zî zêde bîyo. Ekonomîye vera întîxar zêde bîyo. Ez wazena nê probleman çareser bikera. Wexto ke ez bêra weçînayîş ez do zîhnîyetê ‘camêrdîye’ birijna. Keyatîya ke baskêke dewlete ye nika seqet a. Binêsazîyo ke ci rê vanê keyatî veng kerdî. Goreyê mi ganî ma mîyanê nê çîyî pirr bikerê.”