RIHA - Hemsereka Pêroyî ya DEM Partîye Tulay Hatîmogûllari Pirsûs de qisey kerd û wina bale ant serê tifaqê AKP-MHPyî: “Ganî tu kurd raya xo nêdo AKPyî. Her raya ke ampûlî rê yena dayîş semedê MHPyî şina.” 

 

Hemsereka Pêroyî ya Partîya Têduştîye û Demokrasîyî yê Şaran (DEM Partî) Tulay Hatîmogûllari qezaya Pirsûsî ya Rihayî de şarî reyde ameye têhet. Tulaye û heyetê aye reyde taxa Elîgorî de bi vilan ameyî pêşwazîkerdiş û dima ra zî bi konvoyêke derg a wesayîtan derbazê qeza bîyî. Welatijê derûdorê zî heyetî bi nîşaneyê serkewtişî pêşwazî kerd. 

 

Tulaye verê buro de wina vat: “Pirsûs, xetêke têkoşînî yo. Yê ke vanê qey do ma bêveng bikerê, wa operasyon û netîceyê weçînayîşî yê verê biewnê. Ma do ê zîhniyetê ke şaredarî bi bloqê betonan açarnayê zîndan, birijnê. Hamnanî ma ameyî serdayîşê Pirsûsî û ma bi çimanê xo dî ke Pirsûs senîn yeno cezakerdiş. O wext rayîrî nêamebî viraştiş û mîyanê tozî de bîyî û nika zî her ca herrî de yo. Do şarê ma serê sindoqe de cewab bido.”

 

Tulaye qiseykerdişê xo wina qedêna: “Ma do hem Pirsûsî, hem zî Şaredarîya Bajarê Girdî bi dest bikerê. Ganî kurdî raya xo nêdê AKPyî. Her raya ke ampûlî rê yena dayîş semedê MHPyî şina. Cayê ke nêeşkenê serkewte bibê zî bi weçînîtoxanê sexte wazenê bidest bikerêz. Ma do nê veng vejê. Ma do pirsûsîjan teber ra pîya bîyarê. Wa her kes rehberê telefonê xo biewno û semedê ameyîşê tîya muracatê DEM Partîye bikero. Ma do pîya bixebitîyê û hem Şaredarîya Bajarê Girdî hem zî yê Pirsûsî bi dest bikerê.” 

 

Pêvînayîş bi sloganê “Ma do bi xoverdayîş bi ser kewê” peynî bî. Tulay Hatîmogûllari û heyetê aye reyde dima ra pîya şî zîyaretîya esnafan.