Zelal Tunç

 

WAN - Weçînitoxê Wanî bale antî serê polîtîkayê tecrîd, înkar û îmhayî yê hemverê şarê kurdî û vatî: "Cinî do cewabê tewr xurt 31ê Adare de bidê qeyûman. Sewbîna vera zilmê hemverê kurdan zî ma do têkoşînê xo dewam bikerê." 

 

Weçînayîşê herêmî rê demêk kilm mend. Partîya Têduştîye û Demokrasîyî (DEM Partî) pêro bajaran de xebatê xo bi coşêke pîl dewam kena. Wan de bi zîyaretê weçînitoxan yê dewe, qeza û bajaran, bi akerdişê buroyê weçînayîşî xebatî dewam kenê. 

 

Weçînitoxê Wanî derheqê weçînayîş û waştişanê xo yê şaredarîye ra ajansê ma rê qisey kerdî. 

 

Kadriye Gezicî: Seba aştî û demokrasîyî ganî her kes rayê xo bido DEM Partî. Sewbîna eke şarê kurdî bibo yew do aştî û demokrasî bêro nê welatî. Sewbîna bi yewîye ma do serekê xo û tepişteyanê xo eşkenê azad bikerê. 

 

Vesîle Paçali: Weçînayîşê herêmî de do şarê kurdî polîtîkayê qeyûman veng bivejno. Ma şer nêwazenê. Ma wazenê heme tepişteyê sîyasî serbest bêrê veradayîş. Sewbîna ganî her kes xebatê weçînayîşî dewam bikero. 

 

Şadiye Aktî: Ganî Wan de cinî serkêşîya weçînayîşî bikera. Ma do raya xo bidê xo û şaredarîyê xo dest bifînê. Vera tecrîd û seba aştîye ganî şarê kurdî raya xo bida partîya xo. Ganî her kes destê xo bido serê wijdanê xo û wina şêro serê sindoqan. Namûs yeno manaya nasname, herre û raye. Ma do wayîrê namûsê xo bivejê. 

 

Hazal Ozoran: Ma tena heqanê xo wazenê. Semedo ke ma kurd ê ma raya xo danê DEM Partî. Ganî kurdî bêveng nêmanê û seba heqanê xo xover bidê. 

 

Cahîde Şen: Ma seba ziwan û nasnameyê xo têkoşîn kenê. Qey zilm bi ma kenê. Ganî sîyastemedarê tepişteyî serbest bêrê veradayîş. Ma zî sey şaranê bînan wazenê azad biciwîyê. Neheqî bi şarê kurdî kenê. Eke yewiya kurdan bibayêne no zilm nêameyêne kerdiş. Coka ra ez raya xo dana DEM Partî. Kesê ke raye bidê partîyê bînan bê îman ê. 

 

 Îrem Çevik: Ez çalakîya Nobeda Edaletî silam kena. Ma wazenê serekê xo ra xeber bigîrê. Çend serrî yo ci ra tu xeberêke nîna girewtiş. Wazenê bi tecrîdî sereyê ma çewt bikerê. La wa biewnê tarîxê ma ra, Seyîd Riza sere çewt nêkerd. Serek Apo zî do çewt nêkero. Ganî polîtîkayê tecrîdî bêrê peynîkerdiş. Turgut Ozal, Suleyman Demîrel, Kenan Evren hemverê kurdan de her tim polîtîkayê înkar û îmhayî ca ardî. Nê kesî zî do bimirê û şêrê. Şer feyde nêdano tu kesî. Îradeyê şarê kurdî bi hêz o la ferqê hêzê xo de nîyo.