Rabîa Onver

 

COLEMÊRG - Namzeta DEM Partî ya Bajêrgê Gulistan Akarsuye bale ant serê kayê îqtîdarî û wina vat: “Hetêk de îradeyê şarî est o, hetêk de zî vengê ke Ege û Behrasîya ra ardî est o. Plan û kayê ke amade kerdî est ê. Ma do sey şarê Bajêrgê rayê xo bişuxinê û bi hawayêkê xurt bibê cewab.” 

 

Weçînayîşê herêmî yê 31ê Adare rê demêk kilm mend û xebatê partîyê sîyasî bê maben dewam kenê. Tirkîya de DEM Partî zî xebatê xo bi akerdişê buroyan, naskerdişê namzetan, pêvînayîşê şarî û pêvînayîşê cinîyan dewam kenê. DEM Partî wayîrê îdîaya ke heme şaredarîyê Kurdistanî bigêra. Bajarokê Bajêrgê ya Geverî de 31ê Adara 2019î de bi temamî 2648 ray ameyî şuxilnayîş. HDP o wext 835 rayî girewtî û AKP zî 950 rayî girewt. AKP yo ke xeylê cayan ra rayê polîs û leşkeran berd bi 115 rayî bi hawayêkê bêhuqûqî şaredarî girewt. 

 

Namzeta Bajêrgê Gulistan Akarsuye derheqê babete de qala projeyê xo kerd.

 

 ‘Şarê ma wayîrê ci vejîyeno’ 

 

Gulistane da zanayîş ke netîceyê raydayîşî de namzet ameya weçînayîş û wina vat: “Şarê Bajêrgê herinda ke nêtêduştîya camêrd û cinîye bikera, kişta ma de ca gênê û moral danê ma. Şarê Bajêrgê goreyê xeylê cayan feodaltîye xo pey de verdayo. Çîyo ke şar tewr zêde ano ziwan no yo; şar eştî planê diyîne. Ma şinê kam ci keye vanê dimayê weçînayîşî ma vîra mekerê. Vanê sozê ke ameyî dayîş nêameyî caardiş. Dima ke ma startê xebatan da ma xebetîyayî. Şarê ma wayîrê partîya xo vejîyeno.”

 

‘Ege û Behrêsîya ra rayan anê’ 

 

Gulistane bale ant serê kayê ke weçînayîşan de yenê kaykerdiş û wina dewam kerd: “Şaredarî bi zîhnîyetê serdestî yena rayîr ra berdiş. Hûmara cinîyê ke şaredarîye de xebetîyenê kêm a. Ma do sey DEM Partî temsîlkarîya têduştîye pê bîyarê. Ma do îradeyê şarî yê têduştî û temsîlkarîye hem şaredarîyan de û hem zî sindoqan de nîşan bidê. Ma do bi DEM Partî reyde polîtîkayêk têduştî taqîp bikerê. Îradeyê cinîyan hetê partîyê bîn ra yeno çinîkerdiş. Hetêk de îradeyê şarî est o û heto bîn de zî rayê ke Ege û Behrêsîya ra yenê est o. Kay û planê ke amade kerdî est ê. La ma do cewabê înan sindoqan de bidê.” 

 

Senî ke AKP şaredarî girewt vernîya bazirganîya sînor girewt 

 

Gulistane bale ant serê girewtişê sînorê bazirganîye yê hetê AKPyî ra û wina vat: “Seba weçînayîşê 31ê Adare xeylê weçînitoxî teber ra ardî. Şar zî zano. Şar vano rayê ke tîya ra yenê înan temsîl nêkeno. Sozê AKPyî ke verê weçînayîşan dabî est ê. Vatî do berê sînorî hîna aktîf bikerê. La nika bazirganîya sînor vinderta. Bazirganîya ke bi tir û wesayîtan ameyêne kerdiş nika bi kîloyan zî nîno kerdiş.”

 

 ‘Ma do cinîyan hêzê kar de bivînê’ 

 

Gulistane dîyar kerd ke xeylê projeyê înan est ê û wexto ke derbazê şaredarîye bibê do hemeyan bikerê dewre û wina dewam kerd: “Bajêrgê de verê cu tu projeyêk nêameyo kerdiş. Ma do sey DEM Partî nê bikerê. Do raşteyê koperatîfê cinîyan bêro awankerdiş. Cinî do berardiş bikerê û berardişê xo biroşê. Do hetê ekonomîye de serê payan de vinderê. Seba wendekaran do kurs û kitabxane bêrê akerdiş. Ma do projeyê paştîdayîşê çinitişî bikerê. Ma do cinîyan hîna zêde raşteyê hêzê karî de bivînê.” 

 

Şar do wayîrê îradeyê xo bivejo 

 

Gulistane qiseykerdişê xo yê peyênan de da zanayîş ke do şaredarî bibê yê şarî û wina peynî kerd: “Ma şarê Bajêrgê ra paştîdayîş wazenê. Wa rayê xo bişuxilnê û wayîrê sindoqan bivejê. Şar bi DEM Partîye ra bawer keno. Wexto ke ma şaredarî bigîrê do şaredarî biba şaredarîya şarî." 

 

Gulistan Akarsuye kam a? 

 

Gulistan Akarsuye serra 1993yî de Bajêrgê de ameya dinya. Unîversîteya Mersînî de rayîrberîya herêmî wenda. Namzeta hemşaredarîya DEM Partîye ya.