Elfazî Toral

 

BEDLÎS - Namzeta hemşaredarîye ya Tetwanî ya DEM Partîye Belkîza Epozdemîre vera heme hêriş, tepiştiş û polîtîkayê pelçiqnayîşî senî ke zîndan ra vejîya têkoşînê xo dewam kerd. Belkîza dîyar kerd ke projeyê aye yê esasî no yo ke Tetwan bikera bajarê cinîyan. 

 

Xebatê weçînayîşî yê Partîya Têduştîyw û Demokrasîyî yê Şaran (DEM Partî) bêmabên dewam keno. Kurdistan de hemwelatijî eleqeyêk pîl nîşanê DEM Partî danê û îdareyê qeyûman qebûl nêkenê. 

 

Namzeta hemşaredarîye ya Tetwanî ya DEM Partîye Belkîza Epozdemîre şaredarî, hemserekatî, projeyê ke do bikera cuye JINNEWSî rê ercnaye. 

 

Belkîza Ezopdemîra ke keyeyê aye wayîrê fikrêk sîyasî yo, bi serran o merkez, qeza û taxan de xebetîyena û serra 1999î ra heta nika xeylê bajar û qezayan de hemserekatîye kerda. Belkîzaya ke di demî Komeleya Heqanê Merdiman (ÎHD) de rayîrberîye kerda, Sêrt de di demî şaredarîya HDPyî de hemşaredarîye kerd. Bi tayînkerdişê qeyûman reyde ameye tepiştiş la vera heme hêriş û tedayan de fek têkoşînê xo ra vera nêda.

 

‘Şarê Tetwanî nê çîyan heq nêkeno’ 

 

Belkîza wina dewam kerd: “Tu çîyêk Qeraxê Tetwan yê Ege, Marmara, Behrasîya ra kêmêr nîyo. Ma do nê qeraxan hîna zêde aver berê. Semedê Tetwanî xeylê projeye ma yê weşî est ê. Tetwan bajarêk wayîrê qeraxî yo. La qerax eşte û çopan ra mird beno. şarê Tetwanî nê çîyan heq nêkeno. Ma do bi şarî reyde xeylê probleman çareser bikerê. Ma tîya ra vejîyenê rayîr. Tetwan wayîrê cayêk taybet o. Hem bi çîyanê xo, hem bi sanayî û hem zî heywankarîye de hetê şaredarîye de yê. Bi projeyan nê çîyî do hîna aver bikewê. Dormeyê bajarî heme awe yo la problemê awe est o. Senî beno ke problemê awe beno. No zî pratîkê şaredarîya AKPyî yo.”

 

‘Ma do probleman çareser bikerê' 

 

Belkîza da zanayîş ke senî şaredarî bigîrê do heme probleman çareser bikerê û wina dewam kerd: “Ma do seba problemê bajarî heme pîya bixebetîyê. Ma sozê nê çîyî danê. Cinîyî sey her ca Tetwan de zî hepsê mîyanê çar dêsan bîyî. Qeyûm senî ame merkezê cinîyan girewt. Ma do nê çîyî vajê. Ma do vernîya înan bigîrê. Ma do Tetwan bikerê bajarê cinîye. Ma do bi sîstemê hemserekatîye reyde projeyê xo bikerê cuye. Cinî bi serran o vera zîhnîyetê serdest de têkoşîn kena.” 

 

Belkîzaye qiseykerdişê xo wina peynî kerd: “Ma do ercayeyê nê bajarî bixebetîyê. Ma di bi şarî reyde berardiş bikerê û pîya bixebetîyê. Problemê taxêke ma do bi şarî reyde çareser bikerê. Ma do pîya çareserîye awan bikerê. No yew aşmî yo ke ma xebatê weçînayîşî dewam kenê. Ma do şaredarîye îdareyê AKPyî ra bixelesnê. Ez nê, bi fehmî ma do qerarê xo bidê.”