Şehrîban Aslan

 

AMED - Fatma Gulan Onkole ya ke ameye koçberkerdiş û newî ra agêraye serê herra xo, bî namzeta hemşaredarîya Sûrî. Gulane bale ant serê vatişê dayîkêke ‘înan dara mi birna la kokê dara mi hema tîya de yo’ û da zanayîş ke ê zî nê kokan ra hêzê xo gênê û Sûr de bîyayîşê xo wazenê. 

 

Weçînayîşê herêmî rê demêk kilm mend û namzetê partîyê sîyasî xebatê xo bêmaben dewam kenê. Amed û qezayanê ci de zî xebatî bêmabên yenê rayîr ra berdiş. Namzeta hemşaredarîye ya Sûrî ya Amedî Fatma Gulan Onkole derheqê xebatan de û waştişê şarî de qisey kerd. 

 

Gulane qezaya Licê ya Amedî de yena dinya û dima ke dewa înan yena veşênayîş bi keyeyê xo reyde koçê Edene kena. Keyeyê Gulane 2000î de agêreno Amed. Gulane Unîversîteya Çukurova de Beşê Têkilîyê Mîyanneteweyî û Zanistê Sîyasetî wanena û dima ra agêrena Amed. Xeylê rêxistinê komelê sivîl de ca gêna.

 

‘Mi şahîdîya çîyê ke ameyî ciwîyayîş kerd’ 

 

Gulane vat mîyanê dormeyêk polîtîk de pîl bîya û wina vat: “Mi şahidîya qewimîyayîşê 2004-2005î kerd. Tutîya mi bi şahidîya înan qewimîyayîşan, bi temaşekerdişê bernameyê televîzyon û wendişî derbaz bî. Keyeyê mi welatparêz bî. Keyeyêk polîtîk bî. Ez zî wina pîl bîya. Mi beşê zanistê sîyasetî wend. No tercîhêke bi zanayîş bî.” 

 

‘Mi senî ke unîversîte qedêna ez ameya Amed’ 

 

Gulane qiseykerdişê xo de vat. “Dimayê unîversîte ez ameya Amed. Rêxistinê heq û komelê sivîl de xebetîyaya. Mi raşteyê cinî, tutî, koçberî û ekolojîye de xebate rayîr ra berd. Hema zî ez xebetîyena. 4-5 serrî yo herêma Sûrî de ez xebetîyena. Serra 2015î de Sûr de rijnayîşêke pîl qewimîya. Xeylê keyeyî ca û wareyanê xo ra bîyî. Raşteyê cuya Sûrî vîrê şarî de bî.”

 

‘Ma bi kokan tepişenê û hema Sûr de yê’ 

 

Gulane wina dewam kerd: “Projeyê Sûrî de talankerdişê vîr û koçberkerdiş ame amanckerdiş. Sûr de tiryak, dizdî, fuhuş û awankerdişê hêzê paramîlîter babeta vatişî ya. Heto bîn de zî texrîbkerdişê tarîxê Sûrî babeta vatişî ya. Merdim sey verê cu xo aîdê uca hîs nêkeno. Dayîkêke wina vana ‘Keyeyê mi uca de bî, baxçe de darê goze est bî. Dara mi birnayî la kokê dara mi uca de yo.’ Ma zî vanê ma kokan ra hêzê xo gênê û xo bîyaye kenê.”

 

‘Keda cinîye yena redkerdiş’ 

 

Gulane dîyar kerd ke problemê tewr pîl ê Sûrî nêtêduştîya cînsîyetê komelî yo û vat ke Sûr bi ruhê tewr dejin ê feqîrîye reyde yeno rî bi rî. Gulane bale ant serê keda cinîye ya ke nîna dîyîş û wina dewam kerd: “Keda cinîye ya keyeyî timî yena redkerdiş. Xebatê ma ganî nê esasî ser de bêrê rayîr ra berdiş. Ganî ma xo biresnê her yew cinîye.”

 

Gulane qiseykerdişê xo yê peyênan de vat: “Weçînayîşan vera xebatê ma bêmaben dewam kenê. Xebate weş derbaz bena. Ma şinê dewan. Bi coş û heyecanêk pîl ma yenê pêşwazîkerdiş. Şar vano ‘partîya ma, ya ma ya, ma do bidê xo’. Na nuqtaye de pawitişê şarî est o. Ma zî heta ke destê ma bêro ma do xo biresnê her kesî.”