AMED - Namzeta DEM Partî ya Bismilî Mizgîn Ekîne da zanayîş ke xebatê xo bi coş dewam kena û derheqê xebatê ke qeza de îdare kenê de ajansê ma rê qisey kerd. 

 

Weçînayîşê herêmî rê demêk kilm mend. Partîya Têduştîye û Demokrasîyî yê (HDP) serra 2019î de xeylê şaredarîyan dest fînabî la hema hema seba heme şaredarîyê HDPyî qeyûm ameyî tayînkerdiş. Nê şaredarîyan ra yew zî ya Bismilî ya Amedî bî. Bismil de HDP se ra 71.34 rayî girewt. Şarê Bismilî nika bi namzeta DEM Partîye Mizgîn Ekîne reyde rayîrê xo dewam keno. Mîzgîne derheqê xebatan de, reaksîyonê şarî de û prosesê namzetîya xo de ajansê ma rê qisey kerd. 

 

Mizgîna ke serê sibayî lez wirzena keye bi keye, dew bi dewe gêrena û bi şarî reyde sohbet kena, seba demo newîye zî malumatan dana. Mizgîne bi esnaf û cinîyê ke rayîr de vînena reyde sohbet kena. Mizgîne perse ma yê qey DEM Partî rê wina cewab dana: “DEM Partî paradigmaya azadîya cinîye esas gêna, xîtabê heme hetan kena, hemcuya azade pawena û bi şarê xo reyde ya.”

 

‘Kişta cinîyan de ca girewtiş muhîm o’ 

 

Mizgîne dewa Hola ya Bismilî de ameya dinya û keyeyê aye welatperwer o. Wendişê xo yê Lîse Amed de wanena û unîversîte zî Stenbol de wanena. Mizgîne dima ke agêrena Amed 4 serran klînîkê xo de xebetîyena. Mizgîne prosesê tewrbîyayîşê xebatê cinîyan zî wina vana: “Kişta cinîyan de ca girewtiş xeylê muhîm o. Coka ra mi qerar da ke ez merkezê ci de ca bigêra.”

 

‘Bi serkêşîya paradîgmaya cinîyan hemserekî’ 

 

 

Mizgîne da zanayîş ke vera polîtîkayê asîmîlasyon, şerê taybet yê serê cinî û ciwnan bîya namzet û wina vat: “Vera polîtîkayan de mi waşt ke şaredarîye de prosesê awanbîyayîşê newîye de ca bigêra. Vera zîhnîyetê yewperestî de paradîgmaya azadîya cinî û sîstemê hemserekatîye de do cuya ekolojîk û demokratîke awan bikerê. Ma do pîya awan bikerê.” 

 

Seba Bismilî proje 

 

Mizgîne projeyê xo yê seba Bismilî zî wina vana: “Seba cinî, ciwan û tutan projeyê ma yê xurt est ê. Bismil de şuxilnayîşê tîryakî zêde bîyo. Seba ke ma ciwananê xo newî ra qezenc bikerê do xebatê ma yê atolyeyan bibê. Do bernameyê ma yê fotograf, muzîk, folklor û wendişê kitabî bibê. Tutê ma ameyoxê ma yê. Coka ra ziwanê dadîye muhîm o. Seba ziwanê dayîke ma do xebatan rayîr ra berê. Ma do merkezê şêwirmendîya cinîyan akerê. Ma do atolyeyan akerê. Ma do sewbîna lazimîyê şarî verê çiman de bigîrê û projeyan bikerê cuye.”