Melek Avci

 

MÊRDÎN - Dayîkê Aştîye yê ke vera tecrîdî de tewrê Nobeta Edaletî bîyî wina vatî: “Heta ke berê Îmraliyî anêbê ma do fek nobete ra vera nêdê.”

 

Rayberê PKKyî Abdullah Ocalano ke 26 serrî yo binê tecrîdê giran de yo, 36 aşmî yo tu xeberêke nîna girewtiş. Zindanan de seba azadîya fîzîkî ya Rayberê PKKyî Abdullah Ocalanî çalakîya grevê vêşanîye dîya destpêkerdiş û 100 rojî xo pey de verda. Bi eynî waştişan merdime tepişteyan zî dest bi Nobeta Edaletî kerd. 

 

Nobetê Edaletî de her roje venga seba peynîkerdişê tecrîdî yeno kerdiş. 

 

Yew waştiş 

 

Merdimê tepişteyan, Emîne Koç, Ayşe Şaman û Şukrîye Çetîna ke Nisêbîn ra ameye û tewrê nobete bîyî wina vatî: “Ma serekatîyê xo wazenê, yan zî ma tîya ra nêwirzenê.”

 

 ‘Wa kişta ma de bê’ 

 

Emîne Koçe vat tepişte 106 rojî ra zêde yo ke grev de yê û wina dewam kerd: “Ma do zî tîya de nobete de bê. Ma tecrîdî qebûl nêkenê. Heta ke tecrîd nêwirzo ma do tîya de bê. Tecrîd wirzo do tepişte zî grevê xo peynî bikerê. Kes goş nêdano vengê tepişteyan. Ma seba edalet tîya de yê. Ma wazenê tecrîd wirzo û grev peynî bibo.”

 

 ‘Ganî dinya ma bivîna’ 

 

Emîne qiseykerdişê xo yê peyênan de vat ke ganî dinya înan bivîna û vat: “Ma zî merdim ê, heqê ma nasnameyê ma zî est o. Wa kişta ma de ca bigîrê. Kişta zilmkaran de yê. wa çareserîyêk bivînê.” 

 

Dinya bêveng a 

 

Ayşe Şamane zî ard ziwan ke yewine waştişê înan serrekatî yo û wina peynî kerd: “Dinya nê zilmî rê bêveng nemana. Ma aştî û têduştîye wazenê. Ma heqê xo wazenê. Wa serekatîyê ma azad bibo. Wa tepişteyê nêweşî serbest bêrê verdayîş. Wa bêrê dermankerdiş.” 

 

Dayîka Aştîye Şukrîye Çetîne zî bale ant serê tecrîdî û wina dewam kerd: “Heta çareserîyêke pê nêra ma fek nobeta xo ra vera nêdanê. Heta ke bi serekatîyê ma reyde pêvînayîş nêro kerdiş, berê Îmraliyî nêrê akerdiş ma do nobete dewam bikerê. Heta tutê ma grev de bê, ma do zî nobete de bê. Ma do rayîrê tutanê xo de bê. Ma rayîrê tutanê xo û serekatîyê xo de yê.”