BEDLÎS - Berîvan Canbeye da zanayîş ke bi coş û hêzo ke 8ê Adare Roja Cinîyan a Cîhane ra girewtî ver bi 21ê Adare ra şinê û wina vat: “Ma do bi ruhê cinîyê Kurdistanî şinê Newroze.” 

 

Newroz bi seserran o her cayê dinya de hetê şaran ra sey roşanî yena pêşwazîkerdiş û şarê kurdî zî bi serran o xeylê cayanê dinya de sey ‘Ameyîşê wisarî’ û roja xoverdayîşî 21ê Adare bi coşêke pîl pîroz kenê. Serre de cinîyê kurdî, şarê kurdî bi rojan verê cu amadekarîya Newroze kenê. Hetê Partîya Têduştîye û Demokrasîyî yê Şaran (DEM Partî) ra Newroza 2024î bi sloganê "Wirze Wextê azadî û serkewtişî yo" do bêra pîrozkerdiş. Cinî bi veng û rengê xo seba raşteyê Newroze xo amade kenê. 

 

Berîvan Canbeye mesajê ke 8ê Adare Roja Cinîyan a Dinya de vejîyayî vernî, ercanaye û da zanayîş ke ver bi Newroze ra coşêke pîl yeno ciwîyayîş.

 

‘Seserra 21ine seserra cinî ya’ 

 

Namzeta endama Meclîsê Pêroyî ya DEM Partî ya Bedlîsî Berîvan Canbeye dîyar kerd ke sey her serre emser zî 8ê Adare bi coşêkê pîl ameyo pîrozkerdiş û cinîyan hêzê xo reyna rona raşte. Berîvane wina dewam kerd: “Ma hêzê xo ancî dî. Ma zanê ke seserra 21ine seserra cinîyan a. Bi nê hişmendîye ma şinê 21ê Adare.”

 

‘Ma bi coşêkê pîl Newroza 2024î pawenê’ 

 

Berîvane coşê cinîyan ê 8ê Adare ard ziwan û wina dewam kerd: “Ma dî ke hêzê ma vejîyayo raşte. Ma bi coşêkê pîl nika Newroze pawenê. Ganî na roje rojêke wisa sey her gamî nêba. Ma hişmendîya nê çîyî de rayîr ra şinê. Ma bi coşêkê pîl Newroza 2024î pawenê. Ma do bi ruhê şorişgêrî pîl şêrê Newroze. Ganî heme embazê ma yê cinî bizanê ke ma do Newroze bi coşêkê pîl pîroz bikerê. Ganî embazê ma yê camêrdî zî bizanê. Ma do bi ruhê cinîya ke dej hîs kena rayîr ra şêrê. Ma do bi şorişgêrîya cinîyan şêrê 21ê Adare.” 

 

‘Ma do bi coş pîroz bikerê’ 

 

Berîvane qiseykerdişê xo yê peyênan de ard ziwan ke bi ameyîşê wisarî reyde heme weşîkîyê Kurdistanî reyêk de vejîyayî raşte û wina peynî kerd: “Hîskerdişê weşîkîyê welatê ma çîyêk zaf weş o. Sey her serre ma do emser zî bi coş û heyecan mizgînîya wisarî Newroze pîroz bikerê. Wext wextê ma yo. Ez heme embazanê xo yê cinîyan silam kena. Ma do bi weşikîyan 21ê Adare de Newroze pîroz bikerê.”