Rozerîn Gultekîn

 

AMED - Namzeta hemşaredarîye ya DEM Partî ya Pasûrî Fatma Aya ke dimayê tayînkerdişê qeyûman qeyûm tayînê herinda aye ame kerdiş û qet fek têkoşînê xo ra vera nêda wina vat: “Ma semedo ke pîya qezenc bikerê ameyî. Hedefê ma no yo ke ma rayan bivejê di katî.” 

 

Weçînayîşê herêmî rê demêk kilm mend. Tirkîya û Kurdistan de xebatê weçînayîşî dewam kenê. Nê cayanê ke xebatê weçînayîşî tede yenê rayîr ra berdiş ra yew zî qezaya Amedî Pasûrî ya. Serranê 2017 û 2019î de qeyûm tayînê şaredarîyan ameybî kerdiş û nika şar seba îradeyê xo rono raşte, rojan mareno. Weçînayîşê 31ê Adare ra ver 6 aşman de 2 hezar û 270 weçînitox teberî ra ardî qeza. Partîya Têduştîye û Demokrasîyî yê Şaran (DEM Partî) ra Fatma Aye namzeta hemşaredarîye ya. Serra 2019î de qeyûm tayînê herinda Fatmaye ameybî kerdiş. Fatmaye dîyar kerd ke seba projeyê xo yê ke nîmcet mendbî temam bikera, newe ra bîya namzet.

 

Rayîro ke 9 serrî de dest pêkerdibî û heta hemşaredarîye şîye 

 

 

Fatma dewa Yayikî ya Pasûrî de yena dinya. Fatmaye dîyar kerd ke 13 serrî ya xo de bar kenê Amed û wina vat: “Serra 92yî de Hîzbullah Farqîn de pîyê mi qetil kerd. Têkoşînê mi o wext dest pêkerd. DEM Partî partîya cinîyan a û ez xo aîdê tîya vînena. Partî bî wesîleya ke ez xo her tim aver bifîna. Keye û dormeyê mi fikr û şexsîyetê mi şekil kerd. Mi xebatê taxan de ca girewt. Koperatîfê Cinîyan ê Baglarî de mi serekatî û hetkarîya serekatîye kerd. Serra 2019î de sey hemşaredara Pasûrî ez ameya weçînayîş. 2017î de qeyûm ame tayînkerdiş. Qeyûm 32 trîlyon deyn verda. Xizmet nêkerd. Ma 5 aşman wezîfe kerd. La qeyûm ame tayînkerdiş û ma ameyî girewtiş. Hîrê aşman ez tepişte menda. Dima ke ez vejîyaya mi xebatê xo newe ra rayîr ra berd.” 

 

Semedê Pasûrî proje 

 

Fatma ard ziwan ke qeza de hema problemê awe yenê ciwîyayîş û wina dewam kerd: “8 serî yo qeza de qeyûm est o û tu xizmetêk nêberdo dewan. Şar hema biran ra awe anceno. Zimistan awe lêşin a, hamnan zî ge-ge yena û ge-ge zî nîna. Eke şaredarî destê ma de bibayêne ma rew ra problemê awe çareser bikerdêne. Projeyê ma est bî. Ma do nê projeyanê xo bifînê cuye. Ma do xizmet bîyarê dewan. Ma do koperatîfê mandrayî awan bikerê. Betalî vera koçberî virazîyeno. Seba çareserîye ma do game bierzê. 2016î de qeyûm ame û merkezê cinîyan, ciwanan, îstîhdamê cinîye, kreşê tutan da qeymeqamtî û camîyan. Raşteyê ke cinî û ciwan şêrê çin o. Ma wazenê nê projeyan pê bîyarê. Ma wazenê kreş û merkezê kulturî awan bikerê.”

 

‘Ma do pîya qezaya xo qezenc bikerê’ 

 

Fatma qiseykerdişê xo yê peyênan de da zanayîş ke şar rayîrberîyê qeyûmî ra aciz bîyo û wina peynî kerd: “Dewlete rayê kaçax ana tîya. Wazena bi rayê kaçaxe qezaya ma bigîrê. Qeyûman tayîn bikerê zî ma tîya de yê, ma do bêrê weçînayîş. Ma serra 2019î de 2 hezarî ra zêde ray qezenc kerd. Ma do serra 2024î de nê rayan bivejnê di kat. Şar qerardar o. Ma xebatê xo bi şarî reyde kenê. Ma keye bi keye gêrenê. Ez venga heme cinîyan kena. Wa raşteyê têkoşînî de bê. Ma do pîya qezaya xo qezenc bikerê.”