Rozerîn Gultekîn

 

AMED - Endama PMyî ya DEM Partî avûkat Pîrozhan Karalîye derheqê qeydkerdişê weçînitoxan ê bêusulî û projeyê weçînitoxê aktîf de qisey kerd û vat: “Merkez û qezayan de ferqê mabene tay o, weçînitoxî ameyî qeydkerdiş. Babeta weçînitoxê aktîfî de hedefê ma 100 hezar o. Ma do vera her tewir weçînitoxê bê usulî de rayê weçînitoxê raşt pê bîyarê.” 

 

Weçînayîşê herêmî ke do 31ê Adare de pê bêro rê demêk kilm mend. Îqtîdar Kurdistan de seba ke îradeyê şarî xesp bikero, kayê cîya rayîr ra beno. Nînan ra yew zî qeydkerdişê weçînitoxan bê usulî yo ke bajarê kurdan de ameyî qeydkerdiş. Goreyê tespîtê DEM Partî 33 herême de temamî 54 hezar û 60 leşker, polîs û sivîl ameyî neqlkerdiş. Îtîrazo ke DEM Partî kerd tena yê derheqê 222 weçînitoxan ame qebulkerdiş. Endama PMyî ya DEM Partî avûkate Pîrozhan Karalîye derheqê babete de qisey kerd. 

 

‘Amancê înan no yo ke tabloya “şar rayê xo dano” awan bikerê’ 

 

Pîrozhane da zanayîş ke yew amadekarîya weçînayîşî ya AKPyî neqlkerdişê weçînitoxanê sexte yo û no caardiş zî taybetî bajarê Kurdistanî de pê yeno. Pîrozhane wina vat: “Kesê ke herême ra nîyê tîya de sey weçînitoxî ameyî mojnayîş. Tay keyeyan de bi seyan kesî ameyê qeydkerdiş. Wazenê mabenê rayan wina bigîrê. 8 serrî yo herême de qeyûm est o. Wazenê bi nê tabloye ‘rayan danê ma’ awan bikerê.” 

 

‘Îtîrazî nêameyî qebûlkerdiş’ 

 

Pîrozhane ard ziwan ke hetê ci yê huqûqî çin o û wina dewam kerd: “Semedê weçînayîşî nê kayî yenê kaykerdiş. Na rewşêka exlaqî nîya. Tu ferqê ci yê zîhnîyetê qeyûmî ra çin o. Kesê ke ma rayê xo danê nika tepişte yê. La qeyûm xebata bajarî keno. Lîsteya weçînitoxan keyatîye de yena daliqnayîş, weçînitoxî bado ke şinê tespîtê xo kenê îtîraz kenê. Îtîrazê Heyetê Weçînayîşê Berz yeno kerdiş. Ganî heyet nê çîyan verê çiman de bigîro û kesê ke tespit kenê lîste ra bivejno. La wina nêame kerdiş û huqûq pê nêame.” 

 

Pîrozhane dewamê qiseykerdişê xo de da zanayîş ke Pasûr, Sûr, Rezan, Peyasê Amedî de bi hawayêkê cidî qeydkerdişê weçînitoxan est o û vat amancê înan no yo ke weçînitoxê kurdî sindoqan ra dûr bifînê. 

 

‘Hedef 100 hezar o’ 

 

Pîrozhane qiseykerdişê xo yê peyênan de dîyar kerd ke sey DEM Partî do vera weçînitoxê kaçax, rayê weçînitoxê raşt pê bîyarê û semedê nê çîyî zî do projeyê weçînitoxê aktîf bifînî cuye. Pîrozhane wina qiseykerdişê xo peynî kerd: “Merkez û qezayan de ferqê mabenî tay o, weçînitoxî ameyî qeydkerdiş. Babeta weçînitoxê aktîfî de hedefê ma 100 hezar o. Ma do vera her tewir weçînitoxê bê usulî de rayê weçînitoxê raşt pê bîyarê. Bêrê ma pîya rayê xo bierzê û wayîrê îradeyê xo bivejê.”