Gulîstan Gulmuş

 

DÊRSIM - Cinîyê Dêrsimî dîyar kerdî ke qeyûmê ke ameyî tayînkerdiş tu xizmet înan rê nêkerdo û vat demo newîye de şaredarîyêke ke înan goşdarî kena, mîyanê şarî de ca gêna wazenê. 

 

Weçînayîşê herêmî ke do 31ê Adare de pê bêro rê demêk kilm mend û partîyê sîyasî xebatê xo dewam kenê. Cinîyê Dêrsimî derheqê problemê bajarî de qisey kerdî û dîyar kerdî ke dimayê weçînayîşan hemşaredarê ke bêrê weçînayîş ganî xizmet şarî rê bikerê û wina vat: “Ganî bikewê mîyanê şarî, probleman bivînê û çareser bikerê.

 

 ‘Xeylê kêmanîyê şaredarîye est ê’ 

 

Husnîye Gul Ekîncî ya ke seba wendişê unîversîte ameya Dêrsim wina vat: “Wexto ke ez newî ameya çîyo ke mi ewil dî neqlkerdiş bî. Problemê pîl est ê. Wesayît nîm saette de reyêk wirzenê. La ganî 10-15 deqeyan de reyêk wirzo. Na babete de kêmanî est ê. Problemêk bîn zî xizmet nîno kerdiş. dorme zaf lêşin o. Xeylê kêmanîyê şaredarîye est ê. No bajar bi xozaya xo yeno zanayîş la ma nê bajarî de xoza hîs nêkerd. Bajar de awanîyê ke vera erdlerzî de saxlem nîyî est ê. Ganî no verê çiman de bêro girewtiş. Taxa Ataturkî de xeylê awanîyê kehen est ê. Herêma Merkez û Alî Babayî de raşte xeylê xerabî. Xebatê rayîrî çin ê. Ganî kombîyayîşê ke şarî rê akerdeyê bêrê kerdiş.”

 

 ‘Semedê cinîyan çîyêk nêkenê’ 

 

Hulya Aydogduye zî eşkera kerd ke xeylê probleman ciwîyenê û wina dewam kerd: “Problemê tewr pîl ê Dêrsimî betalî yo. Betalî vera her kes koç keno. Nufusê tîya kesê ke emre înan zêdeyo ra pê yeno. Problemêk bîn ê pîl zî betalîya cinîyan a. Raşteyê îstîhdamî çin o. Seba cinîyan tu îmkan çin o. Ma binê şertê giran de ciwîyenê. Xoza, bajar texrîb benê. Ganî şaredarî û şar na babete de pîya têbigîro. Xoza nîna pawitiş. Kesê ke hemnan yenê tîya xoza texrîb kenê. Na babete de tedbîr çin o. Ganî ma nê bajarî pîya biwirznê.”

 

 ‘Wa wayîrê Dêrsimî bivejê’ 

 

Songul Yidirime zî nê çîyan vat: “Dêrsim de serê nameyê şaredarîye tu xebate nîna kerdiş. waştişê ma şaredarîya newîye ra no yo. Tu problemêk nîno çareserkerdiş. Dêrsîm bê erc ameyo verdayîş. Averşîyayîşêk çin o. Ma wazenê kulturê ma aver şêro, domanê ma bi ziwanê xo pîl bibê. Nê babetan de tu xebate çin a. Ma wazenê wayîrê Dêrsimî bêro vejîyayîş.” 

 

Cinîyan bi nameyê Perîhan S.ye zî derheqê ciwananê bajarî de ercnayîş kerd û vat ciwanî kewtê çalê tîryakî û vat ke ganî seba wendekarê unîversîte yê ke yurdan manenê çareserî bêro awankerdiş. 

 

Cinîya bi nameyê Duygu Dînlere zî dîyar kerd ke bajar de raşteyê kar de cinîyan rê zêde ca nîno cîyakerdiş û vat heme problemê bajarî bi yewbîyayîşê şar û şaredarîyan eşkeno bêro çareserkerdiş û ganî seba cinîyan proje bêrê awankerdiş.