Şehrîban Aslan-Arjîn Yuksekbag

 

AMED - Ma rojêka xo bi namzeta hemşaredarîye ya Yenîşehîrî reyde derbaz kerd û ma vînenê ke şar îradeyê xo şaredarîyan de wazeno. Hemwelatijanê 7 serran ra bigêrê heta 70 serrî pêro vatişê "yê ma, partîya ma" DEM Partî rê vanê. 

 

Weçînayîşê 31ê Adare rê demêk kilm mend û xebata Partîya Têduştîye û Demokrasîyî yê Şaran (DEM Partî) bi lez dewam kena. Nê qezayê ke tede xebate dewam kena ra yew zî Yenîşehîrê Amedî ya. Namzetê hemşaredarîye yê Yenîşehîrî dîyar kenê ke senî bêrê wezîfe do xizmetê xo yê ke nîmcet mendî temam bikerê. 

 

Namzeta hemşaredarîye ya Yenîşehîrî Safîye Akdage ya û ma rojêka xo pîya aye reyde derbaz kerd. 

 

Ma serê sibayî lezkî bi Safîye reyde buroyê weçînayîşî yê Ofîsî de ameyî têhet. Ma planê xo kerd û zîyaretê esnafê Berê Koyî û Wîlayetî ame kerdiş. safîye û cinîyê kişta aye ver bi Çamlicayî kewtî rayîr. Ma kewtî dikanêk cayê şêranîye û Safîye vat ez namzeta DEM Partî ya û ma ameyî zîyaretê şima. Esnafî vat ke ez şima nas kena û dimayê qeyûman ma do bêrê şaredarî.

 

 ‘Rayê ma partîya ma rê yê’ 

 

Safîye kewt dikanêke perderotişî û cinîyêke aye pêşwazî kerd. Senî ke cinî Safîye dî aye verik kerd. Bi kurdkî qisey kerd û vat: “Rayê ma partîya ma rê yê, Homa hetkarîya şima bikero. Duayê ma seba şima yê." 

 

No şar do şima biweçîno 

 

Safîyeye bazarê taxa Vîlayetî de bi coş ameye pêşwazîkerdiş. Esnaf senî ke Safîye dîyî vatî: “No şar do şima biweçîno.”

 

Safîyeya ke şî tezgahêke bîn, esnafêke bîn aye rê vat: "Her ca zaf vaye yo. Her kes dest veng agêreno. Ekonomî zaf xerepîyaya. Nika tena waştişê ma no yo ke şima ser kewê." Safîye zî vat şaredarî do ê şima biba, berê şaredarî her tim şima rê akerdeyo. 

 

‘Ma wazenê bixebetê’ 

 

Cinîyê ke Safîye dîyî wina vatî: “Na namzete ma ya. Senî ke mi dî mi nas kerd. Ma wazenê problemê ma bêrê çareserkerdiş. Cinîyan rê raşteyê xebate bêro akerdiş. Ciwanî tiryakî ra bêrê xelisnayîş.” 

 

Dima ra ma bi Safîyeye reyde agêrayî Raşteyê Hunerî. Ma bi Safîyeye reyde roportajêk kilm kerd û wina vat: “Qeyûmî ra ver no raşte raşteyê kultur û hunerî bî. Cinî û ciwan tîya de wextê xo derbaz kerdêne. Raşteyê tewr bi asayîş bî. La dimayê qeyûman her çî bedilîya. Cinî ereyê şewe de nêeşkenê tîya ra derbaz bibê. Şuxilnayîşê tîryakî û rotişê ci zêde bîyo. Cinîyanê ciwanan kenê tora fuhuşî. Dimayê 31ê Adare ma do xizmetê xo yê ke nîmcet mendî temam bikerê.”