Oznûr Deger

 

RIHA - Dayîka Aştîye Adalet Çay ke 30 serrî yo bi cil û belgê kurdî tewrê Newroze bena wina vat: “Ma do zî Newroze de azadîya serekê xo biwazê. Ma wazenê serekê ma ma het de bo. Wa na gonî vindarîyo û aştî bêro. Wa kes nêmiro û dayîkî nêbermê. Ma do Newroze de waştişê xo bîyarê ziwan.”

 

Bi nêzdîbîyayîşê roşanê Newroze reyde kelecanê şarî zêde beno û emser do Newroze bi sloganê ‘Rabe dema azadî û serkeftinê ye’ bêro pîrozkerdiş.

Endama Meclisê Dayikê Aştîye ya Rihayî Adalet Çay (65) ke 30 serrî yo têkoşîn kena, hîrê tutê aye semedê zulmê dewlete raşteyê xoverdayîşî bîyî. Adalete 30 serrî yo bi cil û belgê xo yên kurdî raşteyê Newroze de ya. 

 

‘Ma do azadîya serekê xo biwazê’

 

Adalete vat, Newroze roşanê kurdan a û wina derg kerd: “Ganî Newroze xurt û weş derbaz biba û her kes tewr bibo. Newroze şayîya kurdan a. Ganî her kes wayîrê Neweroze vejîyo. Yewin waştişê ma  azadîya serekê ma ya. Hîrê serrî yo ma agahî ci ra nêgînê. Nê reyde şarê kurdî yeno tecrîdkerdiş. Ma wazenê serekê ma azad bibo. Tepişteyî hemverê tecrîdî grevê vêşanîye de yê. Wa kes nêmiro û dayîkî nêbermê.”

 

’30 serrî yo tewrê Newroze bena’

 

Adalete dîyar kerd ke Newrozê verê bi heybet derbaz bîne û wina vat: “Zaf mudaxaleyê Newrozan kerdî. Newroze roşan a. Çira zextan kenê. Çira probleman vejenê. Çira ciwanan tepişnenê. Verê Newrozî zaf weş bî. La ancî zî şarê ma Newroza xo pîroz keno. 30 serrî yo tewrê Newroze bena. La Newrozê verî weşêr bî.”

 

‘Ma waştişê tepişteyan bîyarê ziwan’

 

Adalete wina qedêna: “Ma semedê Newroze cilan derznenê. Ma amadekarîyan kenê. Bi rojan verê ma kelecanî hîs kenê. Wa her kes bi girseyî tewrê Newroze bibo. Ma do waştişê tepişteyan û dayîkê Nobeta Edaletî bîyarê ziwan.