Dîlan Babat

 

DEM Partîye derheqê weçînayîşê 31ê Adare de 24 namzetê hemşaredarîya pîlî de, 49 merkez, 45 bajarok û 378 qeza bi pêroyî 500 cihî namzetê hemşaredarîye yê cinî vet û nêzdîyê hezar zî lîsteyê endamtiya meclîsî yê cinîyan awan kerd. Semedê kotayê cinîyan ê DEM Partîye de xeylêk kesî zî bîyî namzet. Nînan ra yew zî Hacer Fîdan a 43 serrî ya û bajarokê Gundikê Melê de bîye namzeta keyatîye.

 

Hemverê hîrê namzetanê camêrdan

 

Bajarokê ke wayîrê çar taxe yo, bi serran o camêrdî keyatîye kenê. Yewine rey cinîyêke bena namzete û hemverê namzetê camêrdan de têkoşîn kena. Hacere dîyar kerd ke bi xêrê ke DEM Partîye cinîyan rê raşte akerdo bîya namzete û vat: “Semedo ke bimojnî cinî her raşte de eşkenê kar bikerê, bîya namzet.”

 

Bi berdêl ameye zewicnayîş

 

Hacere Gundikê Melê de yena dinya û emrê qijî de bi berdêlî yena zewicnayîş û dayîka 6 tutan a. Hacere da zanayîş ke her çiqas biwaza biwana zî nêwenda û semedê wendişê tutanê xo têkoşînêk pîl daya. Hacere wina vat: “Ma verê nizanabî mamosteyê cinî est ê. Me bizanayîne ma do biwendêne. Cinî xo aver benê, tutanê xo danê wendiş. Semedê averşîyayîşê bajarokî ez bîya namzet. Ez hemverê hîrê namzetê camêrdan de bîya namzet. Nê bajarokî de yewine rey cinîyêke bena namzete. No merdimî kelecan keno. Ez o semedê paştdayîşê cinîyanê bajarokê xo bişuxilî. Projeyê xo qal kena. Paştdayîş wazena.”

 

‘Mi waşt bibî nimûne’

 

Hacer dewam de wina vat: “Cayê ke cinî çinî bê, cuye çin a. Berpirsyarîya tewr pîl her tim serê cinîyan de ya. Mi waşt ez biba nimûne. Mi waşt bimojnî ke cinî eşkenê her çî bikerê û no semed ra bîya namzet.