AMED - Remzîye Teke derheqê 21ê Adare Roşanê Newroze ke bîyo sîmgeyê têkoşîn û xoverdayîşî de ercnayîş kerd û qala serranê 90an kerd ke senî ê deman de pîroz kerdê û vat: “Ma adir qet hewna nêkerd. Kelecan û coşê ci nêqedîya yo. Ma hemverê dişmenî de tepîya game nêerzenê.”

 

Newroza ke dinya de sey ameyîşê wisarî yena pîrozkerdiş seba kurdan mana û muhîmîyêke tarîxî hewênena. Adirê Newroze sey sembolê têkoşîn û xoverdayîşî yeno dîyîş. Roşanê Newroze wexto ke xoza xo newî keno û dinya ripelêk newî akena de pê yeno. 

 

Remzîye dewa Sêrtî de yena dinya û derheqê Newrozê ke verê cu ra ameyî heta roja ewro de qisey kerd û wina vat: “Ê deman de xora têkoşîn dest pêkerdbî. Ma derbazê serranê 90î bîyî. Vatî emşo Newroze est a. Ma hem Newroze baş nêzanayêne û hem zî bi heyecan bî. Merdim bi seserran herre de bimano zî merdim zergûn beno.”

 

‘Ma tepîya game nêeşt’ 

 

Remzîye da zanayîş ke wexto ke adir ameyo tafînayîş dormeyê adirî de govend çarnayî û wina dewam kerd: “Ê wextan de şerê Cizîrî dest pêkerdbî. Xeylê şehîdî est bî. Bi wesayîtan şîyêne serê şarî. Ma ver bi merkezî ra rayîr ra şîyî. Ma adirê Newroze hewna nêkerd. O wext heyecan û xoverdayîş vera dişmenî de gamêke tepîya nêda eştiş. Heta serê sibayî adir nêame hewnakerdiş.”

 

‘Tutan raşteyê Newroze pirr kerd’ 

 

Remzîye dewamê qiseykerdişê xo de dîyar kerd ke her serre û emser zî ruhê ciwanan pîl beno û do roşanê Newroze de bêro ciwîyayîş û wina ard ziwan: “Newroze de tax bi taxe, raşte bi raşte no adir ame tafînayîş. Dimayê 1993yî ez ameya qezaya Bismilî ya Amedî. Bismil wayîrê kulturêk xoverdayox bî. Vera heme qedexeyan ê deman ra heta nika adirê Newroze nêame hewnakerdiş. Ewro bi rehetî Newroze yena pîrozkerdiş. Sebebê ci têkoşînê şarê kurd o. Şarê kurdî wazeno ke wayîrê nê kulturî bêro vejîyayîş û serkêşîya cinîyan pê yena. Cinî wayîrê xoverdayîşê Kawayê Asinkar û adetê ci vejîyenê. Serkêşîye kenê. Serra 2020î de bi teda û şîdet serê şarî de ameyî. La vera heme astengîyan raşte pirr bî. Tutê 10-12 serrî raşteyê Newroze pirr kerd.” 

 

‘Newroze ruhê cinîye kurde ya’ 

 

Remzîye eşkera kerd ke ruhê serranê 90î zaf cîya bî û wina vat: “Roja Newroze cinîyan bi heyecanêk zaf pîl kincanê xo yê renginan xora da û raşteyê Newroze pirr kerdî. Wina asan nêbî. Binê teda û qedexeyan de cinîyan raşte pirr kerd. Newrozre bi ruhê cinîye kurde ser kewt.”

 

‘Wa bi ruhê azadîye Newroze de ca bigîrê’ 

 

Remzîye qiseykerdişê xo yê peyênan de wina vat: “Wa her kes bêro Newroze de ca bigîro. Wa cinîyê kurdî bi kincanê xo yê herêmîyan, seba azadîya Rayberê PKKyî Abdullah Ocalanî û şarê kurdî roşanê Newroze de raşteyan de cayê xo bigîro.”