Elfazî Toral

 

BEDLÎS - Merdimê tepişteyan Kiymet Arvas û Îpek Canbeye bale antî serê rewşa tepişteyan û vatî: “Goş bidê vengê tepişteyan. Tu hêz nêeşkeno îradeyê ma bişikino. Wext wextê yewîtî yo.” 

 

Rayberê PKKyî Abdullah Ocalano ke 26 serrî yo Îmraliyî de tepişte yo ra 36 aşmî yo tu xeberêke nîna girewtiş. Tecrîdê giran ê serê Rayberê PKKyî dewam keno. Her çar hetê dinya de seba azadîya fîzîkî ya Abdullah Ocalanî têkoşîn dewam keno. Çarçeweya xebatan de tepişteyê sîyasî zîndananê Kurdistan û Tirkîya de kewtî çalakîya grevê veşanîye. Tepişte 27ê Teşrîna Peyêne ya 2023yî de çarçeweya kampanyaya "Abdullah Ocalanî rê azadî, problemê kurdî rê çareserîya sîyasî" kewtî grev û roja 113an de dewam keno. Keyeyê tepişteyan zî teber de dest bi Nobeta Edaletî kerd. Çalakî bi qerardarîyêke pîl dewam kena. 

 

Merdime tepişteyan Kiymet Arvas û Îpek Canbeye JINNEWSî rê qisey kerd.

 

‘Ma serekê xo kişta xo de wazenê’ 

 

Kiymet Arvase da zanayîş ke Rayberê PKKyî Abdullah Ocalan 26 serrî yo binê tecrîdêk giran de yo û 36 aşmî yo tu xeberêke ci ra nîna girewtiş. Kiymete wina vat: “Ma tu xeberêke serekê xo ra nêgînê. Ganî bi lezkî pêvînayîş bêro kerdiş. Rayberê heme şaran est o. Serekê ma zîndan de yeno tepiştiş. Ma serekê xo wazenê. Ma wazenê mîyanê ma de bo. Ma wayîrê kultur, huqûq û heqan ê. Yewine waştişê ma azadîya serekê ma yo. Ma bêhuqûqî qebûl nêkenê.”

 

‘Goş bidê waştişanê tepişteyan’ 

 

Kiymete bale ant serê grevê vêşanîye yê tepişteyan û wina vat: “Ma rojêke vêşan bimanê nêeşkenê xover bidê. Tepişteyî hîrê aşmî yo grev de yê. Gelo ê zî merdim nîyê. Cuya înan zî çin a? Tepişteyê nêweşî îşkence kenê. Ganî bi lezkî waştişê tepişteyan bêro caardiş û goş bidîyo vengê tepişteyan. Ez venga her kesî kena. Wa bala xo bidê tepişteyan. Ganî polîtîkayê qirkerdişî yê hemverê kurdan peynî bibo. Wext wextê yewîye yo. Wa serkewtiş ma reyde bibo.”

 

 

‘Têkoşîno bi rûmet ma serê payan de verdeno’ 

 

Însîyatîfê dayîkê aştîye û merdima tepişte Îpek Canbeye seba lajê xo Dîren Canbeyî ke 8 serrî û nîmeyo zîndanê Manavgatî yê Antalya de tepişte yo têkoşîn kena. Îpeke wina ercnayîşê xo ard ziwan: “Tutê ma seba serekî û şarê xo bedel danê. Hetêk ma her tim şikite yo. Hetêk ma zî bi coş û xoverdayox o. Rayîrê înan rayîrê bi rumet û serberzî yo. Vera heme hêrişan ma do tepîya game nêerzê. Çi beno wa bibo ma sereberzê. Têkoşînê înan ma ganî verdeno. Têkoşînê înan yê bi rumet ma serê payan de verdeno.”

 

‘Tu hêz nêeşkeno îradeyê ma bişikino’ 

 

Îpeke qiseykerdişê xo yê peyênan de ard ziwan ke her tim hêvîya înan est a û wina peynî kerd: “Şarê kurdî wayîrê îradeyêk pîl o. Tu hêz nêeşkeno îradeyê ma bişikino. Tu kes nêeşkeno bezreyê ma çinî bikero. Ma yew şinê hezar yenê. Ma serre çewt nêkerd. Ma dişmen ra nêtersenê. Ganî ma têkoşînê xo her raşteyî de berz bikerê. Ma her tim seba aştîye amade yê.”