Dîlan Babat 

 

ŞIRNEX - Hemşaredara Sîlopîye Adalet Fîdane her çend ke qeyûm deyn verdabi zî 5 serran de îmze eşte projeyê pîlî û dîyar kerd ke ganî şaredarîya şarî biba û wina dewam kerd: “Ganî namzetê newî û yê hemşaredarîye, şar tewrê mekanîzmayê qerarî bikerê, ca bidê şarî û goreyê nê projeyan virazê.”

 

Îqtîdar bajarê Kurdistanî de şerêk fîîlî dayo destpêkerdiş û serra 2015î de prosesê rayîrberîyê xoserî de polîtîkayê teda û talanî ke dabî destpêkerdiş, dewam keno. Prosesê rayîrberîyê xoserî kerd bahane û qeyûman tayînê şaredarîyê HDPyî kerd û qeyûm bajaran kerd xirbe. Dewe û bajarokê Şirnexî û qezayanê ci de zî bi qereqol û kalekolan şar kerd binê teda. 

 

11ê Êlula 2016î de qeyûm tayînê şaredarîya Silopî ame kerdiş. Qeyûm xo pey de 273 mîlyon deyn verda. Serra 2019î de şar îradeyê xo destê qeyûman ra girewt. Hemşaredare Adalet Fîdan û Suleyman Şavluk ameyî veçînayîş û 5 serran de îmze eştî projeyê muhîmî. Rayîrberîyê HDPyî 70 mîlyon deynê qeyûmî da û xeylê falîyetan vist dewre. 

 

Hemşaredara Sîlopî Adalet Fîdane ajansê ma rê projeyê xo û pêşnîyarê seba namzetê newîye vat. 

 

Dimayê qeyûman ma texrîbatêke pîl dewr girewt 

 

Adalete da zanayîş ke serra 2016î de qeyûm ameyî tayînkerdiş û şaredarîya Silopî zî qeyûman ra nesîbê xo girewt û vat: “Ma 2019î de şaredarî girewt. La Silopî bajarêk ke ameybî talankerdiş bî. Xeylê deynê şaredarî est bî. Heme raşte ameybî hîbekerdiş. Merkezê cinîyan ameybî girewtiş. Heme raşteyê kulturî ameybî girewtiş. 11 taxê Silopî est bî. Şaredarî hîrê serrî û nîme destê qeyûmî de mend. Şaredarî şarî rê ameybî girewtiş. Qey qereqol bî. Polîs dormeyê ci piştbî. Dimayê qeyûmî texrîbatêk pîl vejîya raşte.” 

 

‘Projeyê ke kewtî dewre’ 

 

Adalete bale ant serê projeyê ke kewtî dewre û vat: “Ma bi îdîayê ke do şarî reyde şaredarî rayîr ra berê, ameyî. Ma nê çîyî ard ca. Ma 11 taxan de kombîyayîş viraşt. Ma waştiş û problemê şarî goşdarî kerd. Ma projeyan hadre kerd. Ma merkezê paştîdayîşê cinîye newî ra awan kerd. Ma seba cinîyan bazarê kede awan kerd, ma kreşe tutan akerd. Ma seba ciwanan raşteyê kulturî akerd. Ma merkeze şêwirmendîya cinîyan akerd. Mudira polîtîkayê cinîyan gure ra ameybî eştiş. 100 cinîyî gure ra ameyî eştiş. Ma yewîye awan kerd. ma taxe û dewan de perwerde da. Ma vera îstîsmarê tutan de perwerde da. Ma bazarê keda cinîye de 11 dikan, kafeyêk û cayê kursî akerd. Ma hûmara cinîyê xebatkar ê şaredarîye de zêde kerd. Ma temsîlkarîya têduştîye pê ard. Planê park, raşte û îmarî de cinî ca gênê.” 

 

Projeyê kulturî 

 

Adalete derheqê projeyê kulturî de zî wina vat: “Qeyûman dezgehê kulturî girewtbî. Ma kitabxaneyê Mîr Celalet Elî Bedirxanî awan kerd. Ma Merkezê Kulturî yê Eyşe Şane awan kerd. No waştişê cinî û ciwanan bî. Waştişê kreş û hewzan est bî. Dimayê weçînayîşî ma do înan zî akerê. Do kreşî bi ziwanê kurdkî perwerdeyî bidê. Xozaya ma her roje yena qetilkerdiş. Ma vera nê de bi seyan darî rona. Projeyê ma yê kompleksê cinîyan est bî. Ma do tewrê îhaleyê ci bibê û embazê ma yê newî do bifînî cuye. Ma do Parka 8ê Adare akerê. Ma do Parka Hunerî zî demêke kilm de akerê.”

 

‘Şaredarîyê ma eşkenê vera talanî de vinderê’ 

 

Adalete qiseykerdişê xo wina peynî kerd: “Her bajar û her qeza yewbînan ra cîya yê. Seba şarê Sîlopî çi lazim bikero şar zano. No çî seba herêmê bîn zî derbazdar o. Sîstemê ma yê ercaye yê hemserekatîye est o. Ma her wext sîstemê fermuarî vist cuye. No seba ma şansêk pîl o. Ganî cinî, ciwan û tutî bêrê goşdarîkerdiş. Ganî nê projeyî bikewê cuye. Ganî seba cinîyan projeyê cîya bêrê awankerdiş. Ganî pêşnîyarê cinî û ciwanan bêro goşdarîkerdiş. Ganî namzetê newî yê hemşaredarîye şarî tewrê mekanîzmayê qerarî bikerê. Ca bidê şar û goreyê nê çîyan projeyan hadre bikerê.”