Melek Avci

 

 MÊRDÎN - Nobetê Edaletî 8 merkezan de bi sloganê "Seba edaletî ma tecrîdî bişiknê" dewam kenê. Çalakîkerê nobete yê Mêrdînî bale antî serê tecrîdî û grevê vêşanîye yê tepişteyan û vatî: "Ma tîya de seba serekê xo û seba tutanê xo nobet tepişenê. Çareserî do bi pêvînayîşê serekatî pê bêro."

 

9ê Teşrîna Verêne 1998ine de hemverê Rayberê PKKyî Abdullah Ocalanî komployê mîyanneteweyî dest pêkerd û 15ê Sibata 1999ine de teslîmê Tirkîya ame kerdiş. Rayberê PKKyî a roje ra Îmraliyî de binê tecrîdê giran de yeno tepiştiş. 36 aşmî yo tu zanayîş ci ra nîno girewtiş. Hemverê tecrîdî û semedê azadîya Abdullah Ocalaî 10ê Teşrîna Verêne de 74 merkezê dinya de bi sloganê "Abdullah Ocalan rê azadî, problemê kurdî rê çareserîya siyasî" kampanya ameye destpêkerdiş. 

27ê Teşrîna Peyêne de zî zîndanê Kurdistanî û Tirkîya de grevê vêşanîye bi eynî sloganî ame destpêkerdiş. Bi sloganê “Semedî edaletî ma tecrîd bişkînê semedê aştîye ma bibê vengê zindanan” Wan, Amed, Mêrdîn, Êlih, Mêrsîn, Edene, Stenbol û Îzmîr de zî bi eynî amancî çalakîya "Nobeda Edaletî" ameye destpêkerdiş.

 

Nobeta Edaletî ya Mêrdînî ke bi waştişê azadîya fîzîkî ya Rayberê PKKyî Abdullah Ocalan û çareserîya problemê kurdî ke Rêxistina Partîya Herêmê Demokratîke (DBP) ya Mêrdînî de dîyabî destpêkerdiş bi zîyaretan dewam kena. Çalakîkerî Nobeta Edaletî û endamê Dayîkê Aştîye Nure Terlak û Atîye Yilmaze ajansê ma JINNEWSî rê qisey kerd û bale antî serê muhîmîya Nobeta Edaletî.

 

 'Ganî pêvînayîşê pê bêro’

 

Nureye da zanayîş ke semedo ke welat de edalet nêmendo dest bi Nobeta Edaletî kerdî û wina dest bi qiseykerdişê xo kerd: "Ma seba edalet tîya de yê. Çi heyfo ke welat de edalet nêmendo. Eke edalet bibayêne do tutê ma grevê vêşanîye de nêbayêne. Rewşa serekê ma do biameyêne qiseykerdiş. Ma her roje venga welatê bînan kenê û vanê ke hemverê nê caardişan de vengê xo bivejnê. Ma zî merdimî, herra ma û rayberê ma est o. Kilîtê çareserî rayberî yo. Eke avukat şêrê pêvînayîş bikerê do xeylê problem bêrê çareserkerdiş. Do derdê ma bêro dermankerdiş."

 

 'Goreyê kêfê xo têgêrenê' 

 

 Nureye diyar kerd ke weşîya tepişteyan ra şikdarî û wina dewan kerd: "Êdî bes o. Ganî her kes qetlîyaman rê vajo nê. Ez venga heme dayîkan kena ke wa vera teda û zulmî de, wa vera rijnayîşê gonîye de vinderê. Çîyo ke nê çîyan bido vindarnayîş ma dayîkî û serek o. Dewletê bînî vatî do zîyaretîyê zîndanan bikerû la kam ca de yê? Eke ewil bişîne Îmrali do problemê ma biameyêne çareserkerdiş. Goreyê kêfê xo zîndanan vanê û şinê zîyaretan. Ma êdî çareserî wazenê. Biciwîyo xoverdayîşê zîndanan."

 

'Ma do nobeta xo dewam bikerê' 

 

Atîyeye da zanayîş ke eke çareserî biwazê wa şêrê Îmrali û wina ercnayîş kerd: "Ma tîya de seba serekê xo û seba tutanê xo nobete tepişenê. 10 rojî ra zêdeyo ke grev dewam keno. Ma do kişta tutanê xo de bê. Ma heta nêresê netîceyêk ma do nobeta xo dewan bikerê. Eke siba zî şêrê do aştî pê bêra. Ma dayîkî êdî merdî, teda û zilm ma nêwazenê. Çareserî bi serekê ma pê yeno."

 

Atîyeye qiseykerdişê xo yê peyênan de wina vat: "Îmrali û heme zînadananê bînan de tedayêka giran est a. Ma vera nê çîyan de mîyanê çalakî de yê. Kesêk nêeşkeno ma vindarno. Ganî tecrîd bêro peynîkerdiş û dima ra ma do fek çalakîya xo ra vera bidê."