Şehrîban Aslan

 

AMED - Namzeta hemşaredarîya Rezanî ya DEM Partî Leyla Ayaz vat: “Demê şaredarîyê ma de tîryakî sewîyeya cêr de bî. Ma do vernê de hemverê polîtîkayê şerê taybetî de têkoşîn bikerê. Ma do problem şarî reyde çareser bikerê.”

 

Weçînayîşan rê demêk kilm mend. Partiya Têduştîye û Demokrasîyî yê Şaran (DEM Partî) her ca de xebatê xo kena. Namzetê hemşaredarîya Rezanî ya DEM Partî Leyla Ayaz zî xebatê xo kena.

 

Leyla Ayaz JINNEWSî rê derheqê prosesî de ercnayîş kerd.

 

‘Bi serran mi wareyê cîya de xebatan kerd’

 

Leyla 1980î de Licê ya Amedî de ameya dinya, Unîverîsteya Ataturkî, Îdareyê Herêmî wenda. Leyla wina vat: “Demêk derg o têkoşînê azadîye de ya. Hemverê şîdetê cinîye de têkoşîn de bîya. 5 serrî mi hemserekîya MEBYA-DERî kerd. 3 serrî hemserekîya TUHAD-FEDî kerd. Mi îdareyê DBPyî kerd. Hîrê serrî binê banê TJAyî de şuxilyaya. Nika namzeta Rezanî ya DEM Partîye ya.”

 

‘Ma do vernê de sazgehê ke ameyê padayîş abikerê’

 

Leyla bale ant serê polîtîkayê şerê taybetî û wina vat: “Rezan de polîtîkayê îqtîdarî zaf yenê kerdiş. Ez na rewşe hem vînena, hem eşnawena. Serranê 90î de xeylêk kesî koçê qeza kerd. Bi koçberî reyde şar feqîr kewt. Xêrcê nê serra vîyarte de erdlersêk virazîya. Qezaya tewr zêde erdlerzî rê tesîr bî Rezan bî. Nê betalî û polîtîkayê qeyûmî zêde bî. Qeyûman pêro sazgehê cinî û ciwanan padayî. Hemverê nê de do polîtîka ma çi biba? Ma do senî bêrê ma do vernê de sazgehê cinîyan, stargeh, merkezê ciwanan abikerê.”

 

‘Ma do pîya çareser bikerê’

 

Leyla projeyê xo wina qal kerd: “Vernîya ke proje bêrê berardiş, ganî bi şarî reyde bêro roniştiş. Ma do pîya problemê taxe çareser bikerê. Welatîjî wazenê ke ciwanê ke kewtê destê tîryakî bêrê xelaskerdiş. Ê bîn zî wazenê îradeyê xo şaredariyan ra biwazê. Cinî koperatîfan wazenê. Waştişê kahweyê cinî vejîya vernê. Bi taybetî cinîyê Qerejdaxî vanê zîhniyetê camêrdan bivurnê. Waştişê tewr pîl ê cinîyan azadîye yo. Cinî xo asayîş de nêvînenê. Cayêko muracat bikerê çin o. Verê Merkezê Cinîyan ê Kardelenî ya Baglarî est bî. Stargeh est bî. Koperatîf est bî. Amancê ma oyo ke ma nînan newe ra abikerê. Ma bi zerrî ra yenê pêşwazîkerdiş. No ma keyfweş keno. Ma sipasiyê xo semedê şarê xo kenê.” 

 

20 hezarî rayî ameyî vurnayîş

 

Leyla peynîya qiseykeedişê xo de bale ant serê rayê ke ameyê vurnayîş û wina vat: “Yew zî babetêke bîn ya muhîm weçînîtoxê ke ameyê vurnayîşî yê. Rezan de 20 hezarî weçînîtoxê bê qeyd ardê. Nê kam ê, çara ameyê, agahîya ma çin a. Ma îtîrazê xo kerd. La netîceyêk pozîtîf bidest nêkerd. Nê semed ra heme kesê ke teberê bajarî de yê wa bêrê raya xo bişuxilênê.”