RIHA - Hemverfekê Komîteya Amadekarî yê Newroze Ahmet Taşî venga tewrbîyayîşê Newroze ke do 23yê Adare de Riha de bêra pîrozkerdiş kerd û vat: "Êdî wextê şikitişê tecrîdî yo û bi Raybertî reyde cuye azad o." 

 

Komîteya Amadekare ya Newroze ya Rihaye derheqê Newroza Rihaye ke do 23yê Adare de roja Şeme raşteyê kişta Stadyûmê 11ê Nîsane bêra pîrozkerdiş, eşkerayî da. Namzetê Hemşaredarîye yê Bajarê Gird ê Riha Celaledîn Erkmen û Gulşen Ozere û pêameyoxê Platformê Ked û Demokrasîyî yê Rihayî verê awanîya Rêxistina Partîya Têduştîye û Demokrasîyî yê Şaran (DEM Partî) a qezaya merkezî Halîlîye de eşkerayî dayî. Namzetê hemşaredarî yê qezayanê merkezî yê Karakopru, Eyyubîye û Halîlîye yê DEM Partî û xeylê kesî tewrê eşkerayî bîyî. 

 

Hemverfekê Komîteye Ahmet Taş eşkerayîya xo ya ke binê pankartê 'Wurzê we, wext wextê serkewtiş û azadîye yo' de wend de wina vat: “Newroze bi hemdemkerdişê Mazlum Doganî ke Kawayê Asinkarî ra girewto, pêşkêşê ma ameye kerdiş. Şarê kurdî her hetê tarîxî de vera îqtîdarî, kolonyalîstan, dagirkerî û qirkerdişan de têkoşînêk pîl rayîr ra berdo.” 

 

 'Wextê vera qirkerdişî yo’ 

 

Ahmetî dewamê qiseykerdişê xo de derheqê Newroze de nê malumatan pare kerd: “Ma do bi tewrbîyayîşê Hemserekê Pêroyî yê DEM Partî Tuncer Bakirhan, Parlamenterê DEM Partî yê Riha, namzetê hemşaredarîye yê bajar û qezayan û hunermend Ozan Kazo û JÎNMAye Newroze organîze bikerê. Ma heme şarê xo dawetê Newroze kenê û meşaleyê xoverdayîş û azadîye Kawayê Asinkar, Şeyh Saît, Seyîd Riza, Mazlum Dogan û Birêz Abdullah Ocalanî ra girewto. Wextê şikitişê tecrîdî yo. Cuya azade ya bi Rayberî reyde, caardişê yewîya neteweyî ya kurdî, pawitişê nasname û kulturê xo yê bi ziwanê dayîke, vera îşxalkerdişî, îstîsmar û qirkerdişî de yo.”

 

 'Ma do raşteyê aştîye de bê' 

 

Namzetê Hemşaredarîye yê Bajarê Gird ê Rihaye yê DEM Partî Celalettîn Erkmen eşkerayîye de qisey kerd û vat: "Ma do roja 31ê Adare sey roja serkewtişî îlan bikerê. Ma do heme şaredarîyê xo bikerê şaredarîyê şarî." Namzeta bîn a hemşaredarîye Gulşen Ozere zî vat: “23yê aşme de seba aştîye raşteyan de ca bigîrê.”