Dîlan Babat

 

ŞIRNEX - Dayîka Aştiye Asmîn Aksoya 100 serrî da zanayîş ke heta nê emre xo şahidîya xeylê xoverdayîş, şer û aştîye kerda û vat ke têkoşîno ke dayo têkoşînêke ercaye yo. 

 

Dayîka Aştîye Asmîn Aksoya 100 serrî qaseyo ke teda û zilm dîya, têkoşîn û xoverdayîş zî dîya. Asmîne dîyar kerd ke bi serran sey dayîka aştîye têkoşîn rayîr ra berda û yewine waştişê aye caardişê aştîye yo. 

 

Asmîne bale ant serê têkoşîno ke dayo û vat: “33 serrî yo mîyanê têkoşînî de ya. Mi her çîyî dî. Çi destê mi ra ame mi kerd. Hîrê tutê mi mîyanê têkoşînî de bîyî. Lajê mi yê tewr pîl 11 rojan binê îşkence de mend. Ardî Şirnex û 3 aşman binê îşkence de mend. Dima ra berdî zîndanê Mêrdînî. 6 serran tepişte mend. Dima ra serbest ame verdayîş. Bi zorî berdî leşkerî. Dimayê leşkerîye reyna ame tepiştiş. Lajê mi mecbur mend şêro Iraq. Uca de seqet bî. Agêra û bi bahaneyê hetkarîya PKKyî kerdo ame tepiştiş. Mi xeylê zehmetî ant. Kênaya mi, torinê mi û hîrê birayê mi şehîd kewtî. Ez înan pey de ya. Têkoşînê înan ercaye yo.”

 

‘Hewl danê koyanê ma destê ma ra bigîrê’ 

 

Asmîne vat keyeyê aye koçer bîyo, dima ke zewecîyaya zî koçerî kerda û wina dewam kerd: “Dima ke emrê ma aver şî ma ameyî Sîlopî. Bi serran ma zozanan de ciwîyayî. Mêrdeyê mi dinyaya xo bedelnaye. Ez û tutê xo ma tena mendî. Zozanan de cuya ma baş bî. Manayêka cuye est bî. Hîsgêrî çinî bî. Dima ra ma xeylê dejî antî. Ez heme koyanê xo gêraya. Cudî û Gabar de cayo ke ez nêşîya çin o. La her çîyê ma destê ma ra ameyî girewtiş. 30 serrî yo semedê aştîye têkoşîn kena.”

 

‘Têkoşînê mi ercaye yo’ 

 

Asmîne qiseykerdişê xo yê peyênan de wina vat: “Ez aştîyêka daîmî wazena. Ez emre xo ra nêeşkena tewrê xebatan biba. Coka ra zî ez zaf hîsin bena. Têkoşînê ma do her tim dewam bikero û kes do nêeşko vernîya ma bigîro. No têkoşînêk ercaye yo. Wa her kes nê têkoşînî de ca bigîro.”