Pelşîn Çetînkaya

 

ÊLIH - Hemsereka DEM Partî ya Êlihî Songul Korkmaze derdeqê modelê hemserekîye ke DEM Partî şina weçînayîşê herêmî yê 31ê Adare de wina vat: “Bi nê modelî reyde cinî hem sîyaset de û hem zî her raşteyê komelî de xo dana mojnayîş.” 

 

Sîstemê hemserekîye ke destkewtişê têkoşînê cinîya kurd ra yo, bajarê Kurdistanî de bi Partîya Aştî û Demokrasî (BDP) reyde rayîrberîyê herêmî de kewt dewre. BDP nê modelî tena seba rayîrberîyê herêmî nê, seba her raşteyê sîyasetî de pê ard û cinîyî bi nê modelî reyde mekanîzmayê sîyasetî de ca girewtî. Sîstemo ke amancê ci rayîrberî û komelêk azadîwaştox ê cinîye yo, serra 2016 û 2019î de bî bahaneyê tayînkerdişê qeyûman. La sîyasetê kurdî, bi sîstemê hemserekîye ke sey xeta morî ya têkoşînê cinîye yeno îfadekerdiş û newî ra xo weçînayîşî rê amade keno. 

 

Hemsereka Partîya Têduştîye û Demokrasîyî yê Şaran (DEM Partî) ya Êlihî û sewbîna hemşaredara Êlihî ke qeyûm tayînê herinda aye bîbî, Songul Korkmaze derheqê modelê hemserekîye ya rayîrberîyê herêmî de qisey kerd. 

 

Songule da zanayîş ke tu partîyêk de nimuneyê hemserekîye çin o û wina dewam kerd: “Ma cinî nîmeyê komelî yê û ganî nîme kadem û rayîrberîyan de bibo wayîrê vatiş. Coka ra serra 2007î de sîstemê hemserekîye bi DTPyî dest pêkerd û serra 2014î de tena partîyê sîyasî de nê, şaredarîyan de zî cayê xo girewt. Ewil her kes şaş bî. Xeylê problem û pers sereyê înan de est bî. La komel nê modelî qebûl kerd.”

 

‘Bi modelê hemserekîye şar kewt rayîrberî’ 

 

Songule ard ziwan ke verê cu rayîrberîyê herêmî yan zî şaredarî sey dezgeho ke tena bi zîhnîyetê camêrdî yene rayîr ra berdiş ameyêne zanayîş, la serra 2012î de ma nê sîstemî eksê ci kerd. songule wina ercnayîş kerd: “Ma nê sîstemî raşteyêk îqtîdarî de yan zî raşteyê ke bi zîhnîyetê camêrdî yenê rayîr ra berdiş de nê, bi temsîlkarîya têduştîye bi fikre cinîye şaredarîyan de da roniştiş. Bi sîstemê hemserekîye ma şar kerd rayîrber. Ma bi camêrd û cinîyan reyde qerar girewt û xebate rayîr ra berd. coka ra sîstemê hemserekîye hende lez hetê şarî ra ame qebûlkerdiş.” 

 

Têkoşîn dewam keno 

 

Songule qiseykerdişê xo yê peyênan de wina vat: “Sîstemê ke hemserekîye û temsîlkarîya têduştîye qebûl nêkerdêne est bî. Coka ra zî na babete de xeylê reyan hêriş ame kerdiş. dezgehê cinîyan ameyî girewtiş û vera nê caardişan de reyna zî ma sîstemê hemserekîye rayîr ra benê. Ma têkoşînê xo dewam kenê. Bi ameyîşê sîstemê hemserekîye reyde cinîyan tena sîyaset de nê, her raşteyî de xo bîyaye kerdî. Sîstemê hemserekîye ra ver şaredarîyan de dezgehê cinîyan çinî bî. La ma ameyî û ma dezgehê cinîyan akerd, înan rê raşte awan kerd. Bi wesîleya sîstemî cinîyan dezgeh û şaredarîyan de ca girewt. Bi hemserekîye reyde cinî zêde ameyî şaredarîyan. Xo parçeyêke tîya dîyî. No zî cinîyan her raşteyê cuye de asan kerd.”