DÊRSIM - Cinîyê Pulurî dîyar kerdî ke krîzê ekonomîye vera nêeşkenê îdareyê xo bikerê û vatî ke raşteyê îstîhdamî kêm ê. Cinîyan vat ke çimeyê probleman hukmatê AKPyî yo. 

 

Kurdistan û Tirkîya de krîzê ekonomîye her ke şino giran beno. Butçeya hezîneye ke şerî rê yeno cîyakerdiş vera krîz her ke şino xorî beno. Krîz tesîrêke pîl her raşteyê cuye ser de kerdo. Hetê ke tewr zêde nê probleman ra tesîr benê zî cinî yê. 

 

Cinîyê ke qezaya Pulurî ya Dêrsîmî de ciwîyenê derheqê krîzê ekonomîye de qisey kerdî û vatî ke raşteyê ekonomîye ke cinîyan rê ameyî cîyakerdiş zaf tay ê.

 

‘Wa raşteyê bazarî bêrê awankerdiş’ 

 

Sermîn Akbalike da zanayîş ke kişta krîzê ekonomîye de problemê betalîye zî pîl o û wina vat: “Ma babeta gidayan de probleman ciwîyenê. Nimune ez keyeyê xo rê nêeşkena goşt bigêra. 5 aşman de reyêk ez qiyme gêna. Kar çin o. Ez nêxebetîyena. Semedo ke qezayêke şenik a îstîhdamê cinîye çin o. Ez nêeşkena lazimîyê xo û tutanê xo bigêra. Cuya komelkî tîya de çin o. Ma cinîyî krîzê ekonomîye vera hepsê keye bîyî. Her çî bîyo vaye. Her kes her ke şino feqîr beno. Dewlemend zî hîna dewlemend benê. Ma zanê çime şinê kam ca. Ganî cinî tewrê berardişî biba, ganî koperatîf bêrê awankerdiş.”

 

‘Xeylê cinîyê ke nêxebetîyenê est ê’ 

 

 Hemwelatija bi nameyê Belkiz Oruke zî ard ziwan ke bi tena sereyê xo îdare kena, seba lazimîyê keyeyî deyn kena û vat: “Ez bi meaşê asgarî xebetîyena. Ez tena îdareyê kena. Mêrdeyê mi nêxebetîyeno. Ez tena keye de xebetîyena û îdare kena. Di lajê mi şinê mekteb. Lazimîyê înan virazîyeno. Ez bi tena sereyê xo êdî nêeşkena her çîyî bikera. Ez nêeşkena lazimîyê taybet bîyara ca. Tîya de seba cinîyan zêde raşteyê xebate çin ê. Kar bibo do xeylê cinîyî tewrê raşteyê karî bibê. Ganî seba cinîyan raşteyê îstîhdamî bibo. Ganî raşteyê koperatîfan bêrê zêdekerdiş.” 

 

‘Kar çin o’ 

 

Cinîya bi nameyê Yurdanur Kayare zî bi viraştişê xaliyan îdareyê xo kena û vat: “Karo ke ma kenê zehmet o. Ma nêeşkenê lazimîyê xo bîyarî ca. Ma heqê keda xo nêgînê. Ez dewe ra yena. Hetê ekonomîye de ez zehmetîyan ancena. Ez yewine reye xebetîyena. Verê cu ez keye de bîya. Ez wazena bixebeta û hetkarî bida her kesî. Di tutê mi est ê. Mi fek mêrdeyê xo ra vera da. Ez serê payanê xo de vindena û ewnîyena tutanê xo ra. Raşteyê karî zêde çin o. Ganî îmkanê karî seba cinîyan bibê.” 

 

‘Bedelê pîlî cinî danê’ 

 

Songul Goke zî wina ercnayîş kerd: “Sebebê krîzo ke yeno ciwîyayîş hukmatê AKPyî yo. Tîya cayêk şenik o. Kar zêde çin o. Vera nê de cinî xîret kenê ke tewrê karî bibê. Nimune wisar de raşteyê sîr û gulîkê de îstîhdam yeno awankerdiş. Krîz her cayê Tirkîya de est o. Berpirsîyarê na rewşe hukmatê AKPyî yo. Semedo ke şerî rê butçe yena cîyakerdiş ma na rewşe de yê. Ma nêeşkenê fêkî û goşt bigîrê. Ma nêeşkenê kira bidê. Ma tîya de xalîyan virazenê. Seba ma cinîyan azadîya ekonomî çend biba do azadî zî hende zêde biba.”