Mîdye Miqted

 

HELEB - Bi des hezaran hemwelatijê bajarê Helebî bi coşêke pîl Newroza xo pîroz kerdî. Cinîyan Newroze de mesajê, "Newroza emserrî do bikerê Newroza serkewtiş û azadîya Abdullah Ocalan” dayî. 

 

Dimayê ke tîje serê taxê Helebî de gur bî 22yê Adare de û binê sloganê ‘Rayber Apo rê azadî problemê kurd rê çareserî’ Newroza 2024î cayê bi nameyê Şiqeyêfê de ameye pîrozkerdiş. Raşteyê Newroze bi beyraqê Yewîya Pawitişê Şarî (YPG), Yewîya Pawitişê Cinîye (YPJ), Kongra Star û fotografê Raberê PKKyî Abdullah Ocalanî ameyî xemilnayîş. 

 

Şayîya Newroze de bi hezaran hemwelatijî bajarê Helebî ra ameybî. Sewbîna şaîîr Ferhadê Merdê bî meymanê Newroza Helebî. Tîya de vengê Abdullah Ocalanî ame goşdarîkerdiş. Adirê Newroze hetê keyeyê şehîdan ra ame berzkerdiş. Dima ra serê nameyê dezgehan, şexsîyetê xoser, partîyê sîyasî û hêzê leşkerî qiseykerdiş kerdî. Sewbîna endama Heyetê Rayîrber ê Meclîsê Partîya Yewîya Demokratîke (PYD) Foza Yusufe qisey kerd. 

 

Sewbîna pîrozkerdiş de xeylê komê muzîk, govende û tîyatroyî vejîyayî serê sahne. 

 

Cinîyan Newroze de mesajê xo da û vatî ke bi kede û têkoşînê xo Newroza emserrî do bikerê Newroza serkewtiş û azadîya Abdullah Ocalanî.

 

Endama Kordînasyonê Kongra Starî Nêrgiz Bekire ajansê ma JINNEWSî rê qisey kerd û vat: "Rewşa hewayî vera qerar ame girewtiş ke Newroze 21ê Adare de nêra pîrozkerdiş. La ma ewro bi coşêke pîl Newroza xo pîroz kerd. 1ê Adare ra amadekariya pîrozkerdişê Newroze ameyêne kerdiş." 

 

Nêrgize qiseykerdişê xo de Newroza Rayberê PKKyî Abdullah Ocalanî û pêroyê şaranê Rojhelatê Mîyanênî pîroz kerd û da zanayîş ke bi coşê Newroze azadîya Abdullah Ocalanî do qetî bikerê. 

 

Fehîme Mihemeda ke tewrê pîrozkerdişê Newroze bî wina qisey kerd: “Ma roja newe ra ganîbîyayîşî yê şarê kurdî û Abdullah Ocalanî pîroz kenê. Ma do êdî bi dewamkerdişê têkoşînê xo 4 parçeyê Kurdistanî bikerê yew û azadîya Rayberê xo qetî bikerê." 

 

Aytan Reşoye zî da zanayîş ke Newroze roşanê serkewtiş û xoverdayîşî ya û wina dewam kerd: "Ma roşanê Newroze yê şervananê azadîya Kurdistan û Abdullah Ocalanî pîroz kenê. Ewro Newroze seba mi manayêke muhîm a û Newroze seba heme şarê bindestî serkewtiş bi xo yo. Semedo ke Kawayê Asinkar seba Şarê bindestî adirê azadîye tavist coka ra zî na roje seba mi zaf rojêka bi manaya."