STENBOL - Bi bahaneyo ke kênaya xo ya tepişte û embazê aye rê pere şirawita, cezaya zîndanî Hatîce Yildiza 75 serrî rê ameye birnayîş. Hatîceya ke serê sedyeyî de keye ra ameye vetiş, ameye tepiştiş. 

 

Derheqê Hatîce Yildiza 75 serrî ke Esenyurtê Stenbolî de ciwîyena û bi bahaneyo ke kênaya xo ya tepişte û embazê aye yê qawişî rê pere şirawita de bi îdîayê “hetkarîya ekonomîye daya rêxistine” dewa ameye akerdiş. Tehqîqatê dewaye 3 serran dewam kerd û 4ine Mehkemaya Cezaya Girane ya Stenbolî bi îdîaya “fînansmanîya rêxistine" 4 serrî û 2 aşmî cezaya zîndanî ci rê birna. Mehkemaya îstînafî nê qerarê mehkemaya herêmî tesdîq kerd. 

 

Badê qerarî polîsan vizêr şan de eşt keyeyê Hatice Yildize ser ke xeylêk nêweşîye ci est ê. Hatîce Yildiza ke rewşa ci giranêr bîye keye ra bi sedye ameye vetiş. Verî bi ambulans berdîya Nêweşxane, dima berdîya edlîye û uca ra zî berdîya Zîndanê Padeye yê Cinîyan ê Bakirkoyî. 

 

Lajê Hatice Yildize, Alper Yildizî vera tepiştişê dayîka xo de reaksîyon mojna û dîyar kerd ke bi rayîrê qanûnî waya aye ya tepişte rê pere şirawitî zîndan û vat: “Heta ewro goreyê qanûnê Tirkîya zîndan rê pere şirawitiş sûc nîyo. No qerar çarçewaya huqûqê dişmenîye de ameyo girewtiş. Bi hawayêkê qanûnî bi rayîrê PTTyî zîndan rê pere şirawîya û no sey suc yeno hesibnayîş.” 

 

Alper Yildizî da zanayîş ke do bi rayîrê avûkatê xo muracatê Mehkemaya Destûrê Bingeyîn (AYM) bikerê.