Rojda Aydin

 

AGIRÎ - Rêxistina DEM Partî ya Agirî 25ê Adare de “Newroza Pîl a Agirî û Mîtîngê Fînalî” pê ard. Hemsereka DEM Partî ya Agirî Ayşe Karakuşe seba mîtîngî veng kerd û vat: “Bêrê ma bi ruhê 8ê Adare û Newroze raşteyan de bê.” 

 

Rêxistina Partîya Têduştîye û Demokrasîyî yê Şaran (DEM Partî) a Agirî 25ê Adare de do “Newroza Pîl a Agirî û Mîtîngê Fînalî” pê bîyara. Mîtîngo ke do merkezê rayîrê çarçate de pê bêro do saet 11.00 û 15.00î de pê bêro. Mîtîng do bi tewrbîyayîşê Hemserekê Pêroyî yê DEM Partî Tuncer Bakirhanî bi ruhê Newroze pê bêro. Sewbîna hunermend Azad Bedran, Mîzgîn Turan, Koma Nînova û hunermendê herêmî bi deyîrê xo bivejê serê sahneyî. 

 

Hemsereka DEM Partî ya Agirî Ayşe Karakuşe seba mîtîngo ke bêro viraştiş venga şarî kerd. 

 

‘31ê Adare de ma do mesajê şarî bidê’ 

 

Ayşe ard ziwan ke mîtîngo ke bêro viraştiş xeylê muhîm o û vat ke ê do bi ruhê Newroze mîtîngê xo virazê. Ayşeye vist vîr ke îqtîdarê AKPyî ke 19 û nîmeyê Agirîyî rayîr ra beno tu çîyêk nêkerdo û wina vat: “Heta ewro seba şarî çi kerdo? Ma bi îradeyê xo nê bajarî rayî ra berê. Ma do xo û bajarê xo rayîr ra berê. Ganî ma weçînayîş de ser bikewê. Ma do bi nê weçînayîşî de zîhnîyetê qeyûm û talanî bişiknê. Ma do sindoqan de cewabêk xurt bidê înan. Waştişê şarî tena xo rayîr ra berdiş o. Coka ra ma do şaredarîye dest bifînê û ma do wina zî bikerê. Ma 31ê Adare de mesajê xo yê pîl bidê.”

 

‘Bi ruhê Newroze û 8ê Adare…’ 

 

Ayşe ard ziwan ke bi ruhê 8ê Adare û Newroze ver bi weçînayîşî ra şinê û wina dewam kerd: “Ma do bi ruhê 8ê Adare û Newroze şêrê serê sindoqan. Eynî wext de ma do bi nê ruhî 25ê Adare de raşteyan de bê û mesajê xo yê pîl reyna bidê. Ma do bi qiseykerdiş û vindertişê xo cewab bidê. Ma do xoverdayîşê Agirî Newroze de pîl bikerê. Na Newroza pîl a Agirî û mîtîngê fînalî ya. Do Tuncer Bakirhan, parlamenterê ma yê herêmî û xeylê kesî tewrê mîtîngî bibê. Eynî wextî de do hunermendî bi deyîranê xo bivejê serê sahne.” 

 

Venga seba mîtîngî 

 

Ayşeye qiseykerdişê xo yê peyênan de vat ke vera qebulnêkerdişê talanî û qeyûman de ganî heme şarê Agirî bêro raşteyê mîtîngî û wina veng kerd: “Bêrê ma pîya bajarêke newî awan bikerê. Wa heme şarê Agirî û qezayan tewrê nê mîtîngî bibo û cewabêk xurt nîşanê zîhnîyetê qeyûm û talanî bido. Ma bi ruhê Newroze raşteyê mîtîngî de bê. Bêrê ma bi coşêke pîl raşteyê mîtîngî de bê. Wext wextê ma yo. Wext wextê Agirî yo. Bêrê 31ê Adare de cewab bidê.”