ÊLIH - Muhterem Ekîncîya ke emrê xo yê şenikîye ra nata vera înkarê kurdan û çînîhesibnayîşê nasnameyî de têkoşîn kena, 30 serrî ra zêde yo ke vera heme hêriş û astengîyan tepîya game nêerzena.

 

Polîtîkayê dewlete yê seba çinîkerdişê kultur, ziwan, nasname û bîyayîşê kurdan bi seserran o dewam keno. Kurdî zî vera nê polîtîkayê asîmîlasyonî de tepîya game nêerzenê. Nînan ra yew zî Muhterem Ekînîcî ya 75 serrî ya û seba pawitişê nasnameyê xo têkoşîn kena. Muhtereme dewa Hîzonî ya Kercewsî ya Êlihî ra ya. 13 serrî ya xo de yena zewecnayîş û dima ra bi keyeyê xo reyde şertê ekonomîye vera Êlih de bi ca benê. 11 tutê aye virazîyenê. 

 

Têkoşînê bîyayîşî 

 

Muhtereme emre xo yê şenikîye de teda û hêrişên dewlete nas kena û vera nê hêrişan de têkoşînê bîyayîşî dana, xo mîyanê sîyasetî de vînena. Bi serran o bi qerardarîyêke pîl têkoşînê xo rayîr ra bena û xurt kena. 

 

Seba aştîye têkoşîn kena 

 

Kênaya Muhtereme, Rukene vilakarîya rojnameyê Azadîya Welatî kena û Muhtereme wexto ke newî kewena têkoşînî hetkarîya kênaya xo kena. Muhtereme bi Dayîkê Aştîye reyde seba ke hêrişî peynî bibê û şarê kurdî azad bibo şina Anqara û wina dewam kerd: “Rayîra de ma derb kerdî. Xeylê astengî vejîya. Ma resayê Anqara la nêverdayî ma bi kesî reyde pêvînayîş bikerê. Ma wina agêrayî.”

 

‘Dewaya ma ziwan, heq û welatê ma ya’ 

 

Muhtereme wina vat: “Dewaya ma heq, ziwan û welatê ma ya. Dewlete ma înkar kena. Ma seba heqanê xo têkoşîn kenê. Ma heqê kesî dest ra nêgênê. La dewlete vana yew beyraqe, yew ziwan û yew netew. No heq nîyo. Ma kurdî ameyî û ma do kurd şêrê. Serê Abdullah Ocalanî de tecrîdêke giran est o. Ma do nê tecrîdî qebûl nêkerê. Tepişte vera tecrîdî de greve vêşanîye de yî. Dayîk vera nê de Nobeta Edeletî de yî. Ma paştîdayîş dane heme çalakîyan.”

 

‘Ma fek ci ra nêverda’ 

 

Muhtereme qiseykerdişê xo yê peyênan de wina vat: “Verê cû pîrozkerdişê Newroze zehmet bî. La eynî wext de xeylê zî muhîm bî. Ez qet têkoşînê xo ra poşman nîya. Her kes wayîrê heqî yo. Kurdistan pîl û dewlemend o. Eke Kurdistan azad bibo do kes vêşan nêmano. Ma wazenê serekê xo mîyanê xo de bivînê. Wa ziwanê ma bibo ziwanê fermî.”