XARPÊT - Turunç Kiliçe 10 serrî yo bi nanpewtoxî îdareyê xo kena û venga cinîyan kerd ke wa bixebetîyê û timî mîyanê hewldayîşî de bê. 

 

Turunç Kilinça 54 serrî, qezaya Depî ya Xarpêtî de 10 serrî yo firinê nanî de şuxilîyena. Seba Turunçe xebetîyayîşê cinîyan muhîm o. Turunça ke verê cu bi pesdewarî reyde meşgul bîyêne nika zî karê nanpewtişî kena. Sewbîna serê sibayî bi mêrdeyê xo reyde yena firin û dest bi nanpewtişî kena. 

 

Turunçe 20 serrî yo ke nan pewjena û dimayê demêk qerar daya ke firinê xo akera û 10 serrî yo zî firanê xo de aktîf xebetîyena. Mîyanê komelî de sey “Cinîyan nanpewtoxe" yena naskerdiş. Turunçe wina dest hîkayeya xo kena: "Verê cu ez cayêk de xebetîyaya û karê mêrdeyê mi çinî bî. Tutê mi zewecîyayî û şîyî. Ma heme qerar da û ma waşt ke firinêk wina abikerê.” 

 

Turunçe da zanayîş ke roje de 200, 500 û reyan, ge ge zî 700 nanî pewjena. Goreyê waştişê mişterîyan hûmara nanê ke pewjena bedilîyeno. Turunçe dîyar kerd ke ameyox de û îdareyê înan tîya yo û vat: "Ez her tim xebetîyena. Ez rojêke zî nêvindena û ez serê payanê xo de vindena. Mi 5 tutî pîl kerd. Verê cu mi dewe de bi rotişê penîr û toraqî îdareyê xo kerdêne. Ez timî vana wa cinî bixebetê. Ez wexto ke cinîyê ke xebetîyenê vînena zaf zerrîweş bena." 

 

Turunçe qiseykerdişê xo yê peyênan de dîyar kerd ke nika di kes firin de yî la îdarekerdiş goreyê serranê verênan emser hîna zehmet o û wina qalî kerd: "No karê mi yo û ez xeylê ci ra kêyfweşa la zehmetîyê ci zî estê. Xeylê mesrefê ma virazîyeno. Kirayê keye û dikan ma dano zorî. Meaşê ma çin o, ma tena tîya de çi qezenç bikerê o yo. Nika nanêke bîyo 8 TL û torbeyê ardî zî 800 TL yo. Her çî zaf vaye bîyo. Verê cu herînayîş xeylê zêde bî la nika rewşe wina nîya. Verê cu ma saet 4-5ê serê sibayî de ameyêne û heta 9ê şewe ma xebetîyayêne û nanêke nêmendêne. La nika ma tena 2 xêşe nan pewjenê. Krîzêk est o û ma her çend di kes bibê zî ma nêeşkenê îdareyê xo bikerê. Ez nika nêeşkena kîloyêk goşt bigêra, ez tena eşkena fatureyê xo û kîrayê xo bida."

 

Turunçe da zanayîş ke vera zehmetî û krîzan hewldayîşê cinîyan ê seba xebate muhîm o.