MERKEZÊ XEBERAN - Çarçeweya kampanyaya bi waştişê azadîya fîzîkî ya Rayberê PKKyî Abdullah Ocalanî de Vakur û Rojhelatê Sûrîye de 3 milyon îmza ameyî komkerdiş. Do îmzayê ke ameyî arêdayîş dezgeh û dezgehê mîyanneteweyî rê bêrê şirawitiş. 

 

Rayberê PKKyî Abdullah Ocalan 25 serrî yo Zîndanê Îmraliyî de binê şert û mercê giranan yê tecrîdî de yo. Bi waştişê azadîya fîzîkî ya Abdullah Ocalanî 9ê sibate de Vakur û Rojhelatê Sûrîye de kampanyaya îmzeyan dîyabî destpêkerdiş. Hema wextê kampanya pir nêbîyo hûmara ke amanc bîyêne derbaz bî. 

 

Kampanyaya îmzeyan çarçeweya kampanyaya mîyanneteweyî ya “Abdullah Ocalanî rê azadî, seba problemê kurdî çareserîya demokratîke” de dîyabî destpêkerdiş û heta nika 3 milyon û 17 hezar îmza ameyî arêdayîş. Do kampanya heta 4ê nîsane dewam bikera. 

 

Endama Însîyatîfê Sûrîye ya Azadîya Rayber Abdullah Ocalanî Nuha Omere derheqê kampanyaye de ANHA rê qisey kerd û da zanayîş ke kampanya bi coşêke pîl hetê hemwelatijan ra yena pêşwazîkerdiş û nê malumatan da: “Kampanya do 4ê Nîsane de bi eşkerayîyêke bêra peynîkerdiş.” 

 

Nuha Omere dîyar kerd ke hedefe înan 3 milyon îmza bî û wina dewam kerd: “Nika bîyo 3 milyon û 17 hezar îmza. Nê îmzayî Herêma Vakur û Rojhelatê Sûrîye, Heleb, Hema, Hums û Şamî de ameyî komkerdiş. ” 

 

12 cayan rê ameyî şirawitiş 

 

Nuha Omere bale ant serê şirawitişê mektuban ê seba rêxistinê huqûq û weşîye zî û dîyar kerd ke înan mektube serê nameyê dezgeh, rêxistin û partîyê sîyasî yê herême seba cipersayîşê rewşa Abdullah Ocalanî kom kerdê û 12 rêxistin mîyanneteweyî yê sey Meclîsê Heqê Merdiman, Rêxistinê Çimdarîya Heqanê Merdiman (The Human Rights Watch), Komîteya Vernîgirewtişê Îşkenceyan (CPT), Komîteya Vernîgirewtişê Muameleyo Xirab û Îşkenceyî ya Ewropa (CPT), Rêxistinê Efuye yê Mîyanneteweyî, Meclîsê Ewropa, Nuştegehê Dozgerê Mehkemaya Cezaye ya Mîyanneteweyî, Meclîsê Heqê Merdiman ê Neteweyê Yewbîyaye, Mehkemaya Edaletî ya Mîyanneteweyî, Doktorê Sînornenas, Rêxistina Weşîye ya NYye (WHO) û Komîserîya Berzî ya Heqanê Merdiman ê NYyî rê şirawitî.