ŞIRNEX - Xeylêk nuştox û akademîsyenî zî mîyan de pêroyî 516 kesî, dezgehê qezaya Cizîrî ya Şirnexî de bi eşkerayîyêke paştdayîşê xo yê DEM Partîye reyde neql kerdî. Roşnvîr û nuştoxan vat: "Ma do paştdayîş bidê DEM Partîye." 

 

Semedê weçînayîşê îdareyê herêmî yê 31ê Adare demêk kilm mend. Demêk winasî de nuştox, akademîsyen û rojnamegerî zî mîyan de bi seyan kesî û sazgehî bi wesîleya paştdayîşê Partiya Têduştîye û Demokrasîyî yê Şaran (DEM Partî) reyde verê Medreseya Sor a qezaya Cizîrî ya Şirnexî de eşkerayîye dayî. Eşkerayîye serê nameyê Înîsiyatîfê Nuştox, şaîr, akademîsyen, hunermend û rojnamegerê kurdî û Sazgehê Kultur û Ziwanî de ame dayîş. Pêwa verfeka DEM Partîye Ayşegul Dogan, xeylêk nuştox, roşnvîr, rojnameger, şaîr û kaybazê tîyatroyî zî tewr bîyî.

 

Kesê ke taxa Dîcleyî de ameyî têhet, heta verê Medreseya Sor rayîr ra şîyî. Rayîr de sloganê “Bijî zimanê kurdî” ame berzkerdiş. Eşkerayîye de zî dovîzê “Ez ê bi kurdî bijîm”, “Ez kurd im û perverdehiya bi kurdî dixwazim” û “Ez kurd a perwerdeyîya bi kurdkî wazena” ameyê berzkerdiş.

 

Eşkerayîya bi di lehçeyan 

 

Nuştoxe Jîn Aryen eşkerayîye bi lehçeyê kurmancî wend. Akademîsyen Îsmet Konakî zî bi kirmanckî wend. 

 

Eşkerayîye wina ya:

 

“Hezar hezar serrî û wextî

 

Ameyî vîyartene koyê ma mendî

 

Hezar hezar awî û tofanî

 

Ancîyayî û şiyî warê ma mendî

 

Kurdistan ware û welatêk tewr tarîxî yê merdimîye yo. Neteweya kurdî, neteweyêke tewr tarîxî û qedîm a merdimîye ya. Ziwanê kurdkî, kultur û nasnameyê kurdîye ercê bingeyîn ê kurdan û merdimîye yo ke xeylêk ziwan û kulturan rê bîyo çime.

 

Çi heyf, xeylêk dem û dewranê tarîxî de, seba xeylêk sebebê cîya hêzê serdestî yê xerîbî hêrişê xeylêk wehşî ardê serê kurdan, kurdkî û Kurdistanî. Waştê ke înan werte ra wedarnê. La seba qedîmbîyayîş, wayîrbîyayîş, esilbîyayîş û xoserbîyayîşê kurdan û seba têkoşînê şarê kurdî yo heta nikayên, no waştişê înan bica nêameyo.

 

Bi bedelê pîlî têkoşînêk bêhempa

 

Xususî zî têkoşînê şarê kurdî yê 50 serranê peyînan, kurdan newe ra awan kerdo, nêverdayo ke ziwanê kurdkî, kultur, nasname û ercê kurditî werte bêrê wedaritiş. Neteweya kurdî bi desan serran o seba xelasîye û azadîya ziwan, kultur, nasname û pêro ercê xo yê neteweyî û komelî her wareyî de bêbêzarî û vindertişî, bi qehremanî, çelengî û fedaî û bi bedelê pîlî têkoşînêk bêhempa rayîr ra bena.

 

Wareyêk nê têkoşînî zî wareyê sîyasî û îdareyê herêmî yo. Weçînayîşê herêmî yê vakurê Kurdistanî û Tirkîya 31ê adara 2024ine de yo. Partîyêka ke do Kurdistan û xeylêk cayanê bînan de bikewa weçînitişî DEM Partîye ya.

 

Nasnameyê kurdîtî her wareyî de hîna zêde hîra bê

 

Vakurê Kurdistanî de DEM Partî seba azadîya neteweya kurdî, seba pawitiş û averberdişê ziwan, kultur, nasname û ercê kurdî mîyanê hewldayîş û têkoşînêk somutî de ya. Vîr, bawerî, qerardarî, têkoşîn, hewldayîş û xebatê ci ya na babete de pêro deman ra tewr zêde, tewr xurt û tewr somut a. No çî bi hemleyê serkêşîya heyetê xo yê ziwan û kultur, vindertiş, beyan, eşkerayîye û xebatê xo yê pêroyî fînena verê çiman. Helbet seba asîmîlasyonê kûrî, hîra û xidar ê kurdan sero, ganî têkoşîn û xebatê ziwanê kurdkî, kultur û nasnameyê kurdîtî her wareyî de hîna zêdeyêr, hîrayîn û bi netîce bê.

 

Ganî DEM Partî maddeyê beyannameyê xo bi ca bîyaro

 

DEM Partîye bi rayîrê namzedanê xo yê şaredarîye û îdarekaranê xo yê herêmî, stratejî û polîtîkaya xo ya derheqê ziwanê kurdkî û kulturê kurdîtî de, bi hawayêkê somut, zelal û hîra bi beyanname yanî bi deklerasyonêk bingeyîn ê pirrî, 12ê adara 2024ine, verê gorê mamosteyê pîlî Ehmedê Xanî de rayaumûmî reyde pare kerd. Beyannameyê xo de xususî dîyar kerd ke ziwan, kultur û ercê kurdî xeta înan ya sûr a û soz dayî ke do bi hawayêkê daîmî û somut her dem û her cayî de seba ercan têkoşîn bikerê, kar û xebate rê dewam bikerê. Maddeyê ke nê beyannameyî de ca gênê seba ziwanê kurdkî, kultur û nasnameyê kurdîtî xeylêk muhîm ê.

 

Netîceya weçînayîşî çi bena wa biba, ganî DEM Partî sey beyannameyê xo de zî dîyar kerdibî ke nika ra tepîya hem sey partî, hem zî pêro şaredarî, hem mîyanê xo de, hem zî mîyanê şarî de, bi hawayêkê stratejîk, binîzam, somut û daîmî seba ziwanê kurdkî, kulturê kurdîtî û pêro ercê neteweya kurdî, sewîyeya tewr corî de têkoşîn bikerê, kar û xebatê bingeyîn, netîcebîyaye û mende rayîr ra berê. Seke beyanname de zî bi xususî amebî dîyarkerdiş ke vernîya her çî de wezîfe û berpirsîyarîya sereyîn yê DEM Partîye, şaredarî û îdareyê herêmî yê DEM Partîye yo û ganî her dem, her cayî de û her şert û mercan de sewîyeya tewr corî de bêro caardiş. No sey pêro kurdanê azadîwaştoxan hêvî, bendewarî û waştişê ma yê bingeyîn o.

 

Kurd û Kurdistan bê nasname, kultur û ercê xo azad nêbenê

 

Ganî nêro xovîrrakerdiş ke bi milyonan kurdê azadîwaştoxî seba ziwan, kultur, nasname û ercê bînî yê neteweya kurdî paştdayîş danê DEM Partîye û ganî baş bêro zanayîş ke kurdî û Kurdistan bê kurdî, kultur, nasname û ercê kurdîtî azad nêbenê. Eksê ci, ziwanê kurdkî, kultur, nasname û ercê kurdîtî çiqas werte ra wedarîyê kurdî û Kurdistan zî hende werte ra wedarîyenê.    

 

Semedê nê; ma bi xususî dîyar kenê ke, ganî nê maddeyê seba ziwanê kurdkî, kultur, nasname û ercê kurdîtî yê ke beyannameyê stratejikî yê namzedê şaredarîyê Partîya DEMî de ameyê dîyarkerdiş sey wezîfe û berpirsîyarîya sereyîn bêrê caardiş; seba caardişê înan çi lazim bo sewîyeya tewr corî bêro kerdiş. Xora înan bixo zî bi eynî hawa sozê nê çî; bi vîr, bawerî û qerardarîyêk xurt dayê û dîyar kerdê ke ê do tu astengîyan nas nêkerê û ê do bibê mîmarê ziwan û kulturê kurdî. Ma zî do taqîbkerdox û hetkarê caardişê nê çî bê, seba caardişê înan çi destê ma ra bêro ma do bikerê û her hetî ra paştdayîş bidê, mîyanê hemkarîyêk xurtî de bê.

 

Ma do paştdayîş bidê DEM Partîye

 

Serê nê esasî de, ma bi seyan nuştox, şaîr, akademîsyen, hunermend û rojnamegerê kurdî yê vakûr, başûr, rojhelat û rojawanê Kurdistanî, Ewropa, Qefqasya û welatê bînî yê dinya ke nameyê înan cêr de ameyê dîyarkerdiş, weçînayîşê îdareyê herêmî û şaredarîyan de, her cayî de paştdayîş danê DEM Partîye. Sewbîna pêro şarê kurdî yê xopawitox, azadîwaştox û merdimperwer wazenê ke bi kar, xebate û rayanê xo paştdayîş bidê DEM Partîye, seba serkewtişî her dem û her wareyî de têkoşîn berz bikerê.

 

Dem demê ziwanê kurdkî, kultur, nasname û ercê kurdîtî yo!

 

Seba ziwan, kultur û nasnameyê kurdî û ercê neteweya kurdî her dem û her cayî de têkoşîn!”