Dîlan Babat

 

ŞIRNEX - Nazmetê hemşaredarîye yê DEM Partî yê Şirnexî vera heme bêusûlîyê AKPyî xebatê xo dewam kenê û dîyar kerdî ke do çîyê aîdê şarî tepîya bigîrê û heme pêvînayîşê şarî de nê çîyî vanê. 

 

Serra 2015î de Şirnex de dimayê îlankerdişê rayîrberîyê xoser çarçeweya polîtîkayê şerê taybetî de qedexeyê tebervejîyayîşî zî tede xeylê caardişî merkezê bajar û qezayan de pê ameyî û nê caardişî roj bi roje zêde bîyî. Weçînayîşê herêmî yê 2019î de AKP bi weçînitoxê xeyalî Şirnex girewt û serekkomarê AKPyî Tayyîp Erdogan vatbî ‘Ma Stenbol vînî kerd la ma Şirnexî girewt’. 

 

Heto bîn de ame zanayîş ke namzetê şaredarîya Şirnexî yê AKPyî Mehmet Yarkayî seba rayan bigîro kelepulan vila keno û nê çîyî zî serê hesabê çapemenîya dîjîtale de pare kerd.

 

8 hezar û 287 weçînitoxê xeyalî 

 

AKP ke Şirnexî sey ‘babeta dewlete’ vîneno, nê weçînayîşî de 8 hezar û 287 weçînitoxê xeyalî neqlê Şirnexî kerd. Weçînitoxê xeyalî zafane Sêwas û Hatayî ra berdî uca û înan ra zafane verê cu Cizîr û Sîlopî de wezîfedar bîyî. DEM Partî pêhesnayîş ra dima îtîraz kerd la îtîrazê ci nêameyî qebûlkerdiş. Taxê Yeşîlyurt û Yenî Mahale de ganî tedbîrê pawitişê sindoqan zêde bêro girewtiş. 

 

69 hezar weçînitoxî şinê serê sindoqan 

 

Weçînayîş rê çend roje tena mend û koordînasyonê weçînayîşî derheqê kam ci mekteban de çend sindoqî yenê ronayîş de ercnayîş keno û derheqê weçînitoxê xeyalî de zî Baroyê Şirnexî û hetê bînî de mîyanê fikrdayîşî de yo. Goreyê malumatanê koordînasyonê weçînayîşî Şirnex de 49 taxî de 69 hezar weçînitoxî est ê. Şirnex û dewê ci de temamî do 228 sindoqî bêrê ronayîş. Her mektebêk de hîrê wezîfedarî do bibê û 55 muşahîdî bibê. DEM Partî do maseya krîzî zî awan bikera. 

 

Xebatî dewam kenê 

 

Namzetê hemşaredarîye yê Şirnexî Berîvan Kutlu û Haci Sultanî xebatê xo roja startê weçînayîşî ra nata dewam kenê. Tax bi taxe, keye bi keye, raşte bi raşte gêrenê. Eleqeya şarî seba namzetan zaf zêde ya. Hemwelatijê bajarî ke vera xespkerdişê heqanê înan de hêrsinê dîyar kerdî ke do çîyê aîdê xo tepîya bigîrê û seba nê çîyî zî mîyanê xebatêke pîlî de yê.