Pelşîn Çetînkaya

 

SÊRT - Cinîyê Sêrtî derheqê weçînayîşê herêmî û çîyê ke weçînayîş ra pawenê de qisey kerdî û vatî: “Ma wazenê kesê ke ma bi îradeyê xo biweçînê bêrê rayîrberî.” 

 

Weçînayîşê herêmî yê 31ê Adare rê demêk kilm mend û heme partîyî xebatê xo bêmaben dewam kenê. Partîya Têduştîye û Demokrasîyî yê Şaran (DEM Partî) dewe bi dewe, taxe bi taxe, keye bi keye xebatê xo rayîr ra bena û bi şarî reyde yena têhet. Waştiş û problemê şarî goşdarî kena. Yew nê bajarê ke xebatê weçînayîşî tede yeno kerdiş Sêrt o. Cinîyê Sêrtî derheqê şaredarêyêke senî wazenê de qisey kerdî.

 

‘Wa qeyûm serê herra ma ra şêro’ 

 

Taybet Tekîn: Ma aştî û azadî wazenê. Ma wazenê bajarê xo qeyûmanî ra tepîya bigîrê. Wa qeyûm serê herra ma ra şêro. Qeyûman tu fêde nêda ma. Tîya cayê dişmenîye nîyo. Tîya herra ma ya. Dişmen ameyo ma herra ma ra keno. Ma qebûl nêkenê. Gonîya kurdan tîya de rijîyaya. Wazenê şaredarîyê ma destê ma ra bigîrê.

 

‘Qeyûman dezgehê cinîyan girewtî’ 

 

Soyler Tekîn: Eke şaredarîya Sêrtî destê qeyûmî de nêbayêne, do rewşa cinîyan nika cîya bibayêne. Senî ke qeyûm ame dezgehê cinîyan girewt. Raşteyêk ke cinî tede bixebetîyê nêmend. Coka ra problemê îdareyî vejîya raşte. Ma wazenê şaredarîyê xo tepîya bigîrê. 

 

‘Êdî bes o’ 

 

Kanîye Erdogan: Ma bi hawayêkê xurt şinê weçînayîşan. Nê teda û hêrişan rê êdî bes o. Ma şaredarîyêke ke seba şarî xebetîyena wazenê. Hemşaredarê ma do qeyûman ra hîna baş û zêde bixebetîyê. 

 

'Ma problemê pîlî dî’ 

 

Emîne Dayan: Ma wazenê qeyûman ra bixelesîyê. Ma tu xizmetê qeyûman nedî. Ma hamnanî problemê pîlan dî. Awe nêameyêne. Ma awe bi tankêran ardêne. Ma nêşinê şaredarîyan çike bi ziwanê ma qisey nêkenê. Ma tu kesî şaredarîye ra nas nêkenê. Wa seba cinî û tutan wareyî bêrê akerdiş.

 

‘Ma şaredarîyê xo wazenê’ 

 

Zeynep: Ma şaredarîyê xo wazenê. Ma aştî, serkewtiş û demokrasî wazenê. Seba cinîyan ware çin o. Cinî keye de ameyî hepskerdiş. Şaredarîya ma ser bikewa do çîyê weş bibê. 

 

‘Qeyûman seba Sêrtî çîyêk nekerd’ 

 

Fatma: Cinî azadî û serkewtiş wazenê. Ma wazenê qeyûm şêro. Ganî ma dest bidê yewbînan û qeyûman bişirawê. Çike qeyûman seba Sêrtî tu çîyêk nekerd.