Dîlan Babat

 

ŞIRNEX - Tehlîyeyê Sînan Yaşaro ke dimayê prosesê rayîrberîyê xoserî ke Cizîr de ameybî îlankerdiş, ame tepiştiş û 12 serrî ceza ci rê ameybî birnayîş û hetê Heyetê Îdarî û Taqîpkerdişî ra bi vatişê ‘kêfê ma nêwazeno bivejîyo’ ame astengkerdiş. Waya Sînanî, Sîbel Yaşare vat ke ganî heyet peynîya qerarê xo bîyaro. 

 

Tecrîdê giran ê serê Rayberê PKKyî Abdullah Ocalanî serê heme tepişteyan de tesîr kerdo û bi hawayêkê kêfî tahlîyekerdişê tepişteyan yeno astengkerdiş, pêvînayîş yeno astengkerdiş û binpaykerdişê heqan yeno rayîr ra berdiş. Heyetê Îdarî û Taqîpkerdişî ke tu hetê ci yê huqûqî çin o, qerar dano û îmze erzeno binê binpaykerdişê heqan. 

 

Sînan Yaşarî serra 2016î de dimayê prosesê rayîrberîyê xoserî ke Cizîr de ameybî îlankerdiş, ame tepiştiş û ewil şirawîya Sêwas, dima ra zî surgunê Çankirî ame kerdiş. Tewr peynî surgunê Aksarayî ame kerdiş û ganî 7ê Kanûne de biameyêne tehlîyekerdiş la hetê heyete Îdarî û Taqîpkerdişî ra ame astengkerdiş. 

 

Waya Sînanî, Sîbel Yaşare da zanayîş ke cezaya birayê aye qedîyaya la hema serbest nêameyo verdayîş û vat: “Birayê mi telefon de vat tahlîyeyê ci ameyo astengkerdiş. Heyetî ci rê vato ‘ma nêwazenê ti bivejê teber, kêfê ma wina wazeno’. Birayê mi sey endamê rêxistine ame tepiştiş. La temamê dewaye de yew delîlêk zî çinî bî. Vera ke tu delîlêk çinî bî, 12 serre ceza dayî birayê mi. Birayê mi vat ganî her kes wayîrê tepişteyan bivejîyo.” 

 

‘Tewr peynî mi yew serre verê cu dî’ 

 

Sîbele qiseykerdişê xo yê peyênan de wina vat: “Tehlîyeyê birayê mi di reyan ame astengkerdiş. Nizdîbîyayîşê heyetî nêbeno bêro qebûlkerdiş. Caardişê kêfî dewam kenê. Teda zêde bena. Ganî bi lezkî peynîya nê caardişanê bêhuqûqîyan bêra. Mi tewr peynî yew serre verê cu birayê xo dî. Wazena şêra la şertê ekonomîye vera ma nêeşkenê şêrê.”