Pelşîn Çetînkaya

 

ÊLIH - Parlamentera Dem Partî ya Êlihî Zeynep Oduncu û hemwelatijan prosesê weçînayîşî ercayê. Hemwelatijê Êlihî ke qerardarê qeyûman bişirawê, paweyê 31ê Adare yê. 

 

Weçînayîşê herêmî ke do 31ê Adare de bibo, demêk kilm mend û Êlih de zî DEM Partî xebatê xo bêmaben dewam kena. Şar bi coş û heyecanêke pîl DEM Partî pêşwazî keno. 

 

Parlamentera DEM Partî ya Êlihî Zeynep Oduncu û cinîyê Êlihî prosesê weçînayîşî ercnayê.

 

‘Şar qerardaro qeyûman bişirawo’ 

 

Zeynep Oduncuye da zanayîş ke DEM Partî dimayê weçînayîşê aşma gulane bi şarî reyde kewta mîyanê prosesê rexne û xo rexnekerdişî û na nuqta de namzetanê xo dîyar kerd. Zeynepe wina vat: “Coka ra xebatê weçînayîşî 2-3 aşmî verê cu dîyayî destpêkerdiş. Vernamzetan nê prosesî de xebatê xo rayîr ra berd. Şîyî keye û delegeyan xebat kerde. Mi bi Gulîstan Sonuk reyde xebat rayîr ra berd. ma şîyî her keye. Ma ercnayîşê şarî girewt. Şar bi qerardaro ke qeyûman bişirawo.”

 

‘Cinî hedefê îqtîdarî de ya’ 

 

Zeynepe qiseykerdişê xo yê peyênan de dîyar kerd ke qeyûmê ke tayînê îradeyê şarî bîyî bi taybetî serê cinîyan de teda zêde kerd û wina peynî kerd: “Cinî xora hepsê keye bîyî, planê peynî de yê. La cinî wazenê her raşteyê cuye de xo awan bikerê. Wazenê bi ziwanê xo qisey bikerê û azad bibê. Cinî wazena biba wayîrê vatiş û hemverê cuya înan de hurmet bibo.” 

 

‘Roja ke qeyûm ameyo ma hema nêşîyê şaredarî’ 

 

Hemwelatija Êlihî Perîşan Kaymaze zî nê çîyan ard ziwan: “Roja ke qeyûm ameyî ma asan nîyê. Qeyûm seba zilm bi ma bikerê ameyî tayînkerdiş. Roja ke qeyûm ameyo ma hema seba problemanê xo qet nêşîyê şaredarî. Ma nêwazenê şêrê. Qeyûm ma fehm nêkeno. Ma şaredarîyê ke têduşte û demokrasîyî pawenê, wazenê.

 

‘Bi qeyûman kurdî nêqedîyenê’ 

 

Afîye Bîtmene zî ard ziwan ke şaredarîyêke zelal ke seba cinîyan raşteyan awan kena wazenê û wina dewam kerd: “Ma seba cinî, tutî û ciwanan raşteyan wazenê. Wa ciwanê ma nêşêrê tebere welat. Ez şaredarîyêke zelal wazena. Ez şaredarîya ke têduştîye pawena wazena. Ma kurdî xeylê xurt ê. Kurdî nêqedîyenê. Her ca de kurdî est ê û kurdkî yeno qiseykerdiş. Serê kurdan de teda pê yena. Yê ke têkoşîn kenê binê teda de yê.”