Rojda Aydin

 

AGIRÎ - Îqtîdar û partîyê sîstemî her daîm ziwanê kurdî înkar kenê û meclîs de zî sey “Ziwano ke nîno zanayîş” anê ziwan, la taxê Kurdistanî zî bi deyîrê kurdî propagandaya xo ya weçînayîşê herêmî kenê. 

 

31ê Adare yanî roja weçînayîşê herêmî rê demêk kilm mend. Xebatê partîyê sîyasî bi heme lezê xo dewam kenê. 22 serrî yo welat hetê AKPyî ra yeno îdarekerdiş. Goreyê herêman çend polîtîkayê îqtîdarî bibedelî zî vakur bi polîtîkayê şerê taybetî yeno rayîr ra berdiş. Na polîtîka tesîrê xo pêroyê welatî de kerda û kena zî. Polîtîkayê şerê taybetî xo reyde zî krîzê sîyasî, ekonomî, kultur û komelî ard.

 

Şarê kurdî awankerdişê komare ra heta ewro her tim vera înan polîtîkayê înkarî de têkoşînê bîyayîşê xo û ziwanê xo da. Bi taybetî zî ziwanê dadîye her tim bî hedefe îqtîdaran. Her demî de bi metodê cîya ziwan ame înkarkerdiş û qedexekerdiş. Her raşteyê cuye, mekteb, raşte, cayê kar û meclîsî de… 

 

Qedexeyê serê ziwanî... 

 

Kişta înkar û qedexeyê serê ziwanî de kurdî her raşteyê cuye de seba ziwanê xo mîyanê têkoşînî de bî. Leyla Zana serra 1991î de sey sîyasetmedarêke kurde meclîs de ca girewte. Leyla dimayê sondwerdişî de vatişê xo bi kurdî qedêna. No qewimîyayîş hem meclîs de û hem zî rayumûmî yê Tirkîya de veng da. Nîjadperestan reaksîyonê pîlî mojnayî. Yewna reye nizdîbîyayîşê îqtîdarî yê hemverê kurdî û şarê kurdî de somut bî. Qedexeyê serê ziwanî xo bi fermî ganî kerd. 

 

'Ziwano ke nîno zanayîş' 

 

Kurdî ziwanê dayîka xo vera ameyî qetilkerdiş, tabelayê bi kurdî hetê îqtîdarî ra ameyî vetiş û meclîs de qiseykerdişê kurdî ame birnayîş. Tarîxê nizdî de sey birnayîşê qiseykerdişê parlamentere Salîha Aydenîz, Berîtan Guneş û xeylê parlamenterê bînî... Sey “Ziwano ke nîno zanayîş” ame binamekerdiş. Hunermendê vakurî deyîrê bi kurdî vera bi cezayê tepiştişî reyde ameyî rî bi rî. Metropolan de zî hunermendî bi hêrişan reyde ameyî rî bi rî, konserê înan ameyî qedexekerdiş û ameyî qetilkerdiş. 

 

AKP û eleqeya înan a seba ziwanê kurdî! 

 

Îqtîdaro ke ziwanê kurdî nas nêkeno û sey “Ziwano ke nîno zanayîş” bi name keno, bajarê Kurdistanî yê sey Amed, Mêrdîn, Riha, Agirî, Îdir û xeylê bajarê bînan de bi ziwanê kurdlî xebatê weçînayîşî rayîr ra beno. AKP raşteyê qezaya Rêzanî yê Amedî de deyîra Xelîl Xemgînî ya “Sebra Dila” û qezaya Bazîdî ya Agirî de deyîra Koma Zerdestê Kal a “Barî hey barî”, Partîya Yenîden Refahî bajarokê Xoşxeberî yê Îdirî de deyîra Aynur Dogane ya “Keça Kurdan” û AKP û HUDA-PAR qezaya Panosî ya Agirî û merkezê Îdirî de bi deyîrê kurdî propagandaya xo ya weçînayîşî kenê... 

 

Sîyasetê cil û xoradayîşan 

 

Partîyê îqtîdarî heta ewro kurdî û ziwanê kurdî çinî hesibnayî, weçînayîşan de kurd û deyîrê kurdî yeno vîrê înan. No nizdîbîyayîşêk dirî yo. Sewbîna namzetê Şaredarîya Bajarê Pîl ê Stenbolî Murat Kurum ê AKPyij Amed de tewrê bernameyêk bîbî û kişta nijadperestîyo ke keno de kurdî qisey kerd û dima ra zî nîşaneyê bozkurtî kerd. Kişta tedaya serê ziwanê kurdî de sewbîna cil û xoradayîşê kurdî zî nînê qebûlkerdiş. Namzetê AKPyî yê şaredarîya Bazîdî Cengîz Çelîkî zî bi no hawa propagandaya xo ya weçînayîşî keno. 

 

Şar wayîrê ziwanê xo vejîyeno 

 

Kişta nê pêrûne de zî raşteyê Newroze û weçînayîş de zî eşkera bî ke şarê kurdî bi nê çîyan nêxapîyeno û wayîrê ziwanê xo vejîyeno. Şaro ke raşteyê Newroze pirr kerd û raşteyê Kurdistanî de yo ancî mojna ke do her tim wayîrê ziwanê xo bivejê û do nêrî nê kayan.