AMED - Weçînayîşî rê demêk kilm mend û DEM Partî xebatê xo bê mabên dewam kena û bale ancena serê asayîşê sindoqan. Avûkate Ozum Vurgune muhîmîya asayîşê sindoqan vat û hemsereka DEM Partî ya Amedî Pinar Sakik Tekîne zî venga weçînitoxan kerd. 

 

Weçînayîşê herêmî yê 31ê Adare rê çend roje tena mend û Partîya Têduştîye û Demokrasîyî yê Şaran (DEM Partî) xebatê xo bêmaben dewam kena. Partî verê weçînayîşî venga wayîrvejîyayîşê sindoqan û rayan kena. Endama Komeleya Huqûqnasê Seba Azadîye (OHD) Ozum Vurgun û hemsereka DEM Partî ya Amedî Pinar Sakik Tekîne derheqê asayîşê sindoqan de qisey kerd. 

 

Ozume qiseykerdişê xo de dîyar kerd ke seba asayîşê sindoqan partî perwerde dana muşahîdanê xo û vat: “Muşahîdîye ra wetêr; şuxilnayîşê rayê kabînî yê nimite de yo. Kabînê akerde de raye nîna şuxilnayîş. Sewbîna xêrcê astengdarê mîyanê cayî, astengdarê bîn û kal û pîrî, wexto ke rayan bişuxilnê merdimê înan zî nêeşkenê dekewê kabînî. Ganî serekê sindoqî zî verê ke dekewo kabîn bi vengêk pît ganî vajo û cayê partîyan tena weçînitoxî rê vajo ke weçînitox mohrê xo piro bido. La tîya de hem şar û hem zî weçînitoxî ganî nê çîyî bikerê; Xeylê weçînitoxê neqlkerde ardê Pîran, Pasûr û Gêlî. Ganî nê herêman de hîna zêde tedbîr bêrê girewtiş. Ganî hemwelatijî wayîrê rayê xo bivejê.”

 

‘Bi hêzê asayîşî de ganî çek çinî bo’ 

 

Ozume da zanayîş ke Amed de yew problemêk bîn zî no yo ke xêrcê cendirme û hêzê asayîşî kes zî bi çekan mektebanê qezaye de est ê û wina vat: “Ganî bi hêzê asayîşî de zî çek çinî bo û kişta wezîfedarê sindoqan de nêroşê. Heta zabita zî tede ganî unîformayî mekteban de çinî bê. Hêzê asayîşî bê çek eşkeno raşte de bigêro. Rewşêka negatîf de berpirsîyaro ke probleman çareser bikero.”

 

Dimayê eştişê rayan ganî çi bêro kerdiş? 

 

Ozume ard ziwan ke zabite îmzeyê hîn muhîm ê û wina qiseykerdişê xo peynî kerd: “Wexto ke pusulayê rayan benê ganî wesayît de her partiye ra yew wezîfedarêk bibo. Nê çîyî qebûl nêkenê la ganî uca de wesayît de bibê. Nêbo zî ganî heta ke şêrê YSKyî wesayît bêro taqîpkerdiş. Her partiye ra çimdar eşkeno uca de bibo. Qanûn de no eşkera yo. Ganî hetê hûmartişê rayan de baldar bê. Ganî her weçînitox seba pawitişê raya xo mekteban de bo. Sewbîna Kurdistan de sîstemê qorîcîtî zaf zêde yo. Heta ke wezîfe înan rê nêro dayîş ê nêeşkenê dekewê mekteban.”

 

‘Netîceyê 31ê Adare do tesîr 5 serran ser de bikero’ 

 

Pinar Sakik Tekîne zî vat sey DEM Partî amadekarîyê xo yê weçînayîşî dewam kenê û wina vat: “No weçînayîş seba ma zaf muhîm o. Serra 2019î de cayê ke ma bi peymeyêke tay vînî kerd de îqtîdar weçînitoxan neqlê nê cayan kerdo. Tabî qet şik çin o ke nîno qebulkerdiş. No 8 serrî yo îradeyê ma yeno xespkerdiş. Qeyûm yeno tayînkerdiş. La netîceyê 31ê Adare do tesrî 5 serran ser de bikero. Coka ra partîya ma wazena ke weçînitoxî şêrê serê sindoqan. Partiya ma seba kesê ke Amed de nîyê û nêeşkenê bêrê îmkan dana. Heta nika 2 hezar kesê muracat kerd. Hema muracat nêqedîyayo.”

 

‘Ma seba nasnameyê xo şinê serê sindoqan’ 

 

Pinare da zanayîş ke bi serran o welat de weçînayîş pê yeno û wina qiseykerdişê xo peynî kerd: “Her weçînayîşî de îqtîdar xîleyan keno. Prosesê weçînayîşî de ma bi şarê xo reyde xebate rayîr ra berd. venga ma seba şarê ma no yo; 31ê Adare de şêrê serê sindoqan û raya xo bierzê, wayîrê nasname, kultur û ziwanê xo bivejê. Ma seba îradeyê xo şêrê serê sindoqan.”