WAN - Namzeta hemşaredarîye ya Westanî ya DEM Partî Kubra Aktiye mesajê ‘Ma do xo û bajarê xo îdare bikerê’ da. 

 

Namzeta hemşaredarîye ya DEM Partî ya Westanî ya Wanî Kubra Aktiye derheqê qezaye de projeyê xo ajansê ma rê vat. Kubraye dîyar kerd ke semedo ke dewa înan ameya veşênayîş, keyeyê aye koçê Westanî kerdo û uca ra zî koçê merkeze Wanî kerdo û vat: “Yanî eşkena vaja ke hema pêçekê dadîya xo de mi dest bi sîyasetî kerd.” 

 

Kubraye da zanayîş ke her tim têkoşînî de ca girewta û hawayêkê aktîf 2022yî de dest bi xebatan kerda û wina vat: “Mi serra 2022yî de hemverfekîya Partîya Çep a Keske ya Tuşbaye kerd. La ci ra ver zî ez mîyanê têkoşînî de bîya. Eynî wext de Komelaya Cigêrayîşê Kultur Ziwan û Hunerî (ARSÎSA) zî sey wendekarêke û hem zî sey rayîrberîyêke xebetîyaya. 

 

Kubraye dewamê qiseykerdişê xo de da zanayîş ke aye kêmanîyê derheqê cinî û ciwanan ê Westanî dîya û xo sey berpirsîyar dîya, coka ra bîya namzet. Kubraye wina dewam kerd: “Westan qezayêke xeylê weş a. La derheqê cinî û ciwanan de kêmanî zaf zêde yê.”

 

‘Do dizî û bêusûlî çinî bê’ 

 

Kubraye bale ant serê weçînayîşê herêmî û vat ke seba weçînayîşî xeylê bi îdîa yê û wina qiseykerdişê xo peynî kerd: “Seba şarê Westanî seba cinî û ciwanan projeye ma est ê. Projeyê ma yê tewr pîl do dizî û bêusûlî çinî bê. Ma do dizî nêkerê, rant rê rayîr anêkerê. Ma do xozaya xo talan nêkerê. Ma do xo îdare bikerê. Seba cinîyan ma do kooperatîf akerê. Do raşteyê seba cinîyan bêrê akerdiş. Do mudirîya cinîyan û merkeze şêwirmendîya cinîyan û xeta têkoşînî bibê. Ma do qezaya xo xo bi xo îdare bikerê. Ma venga heme weçînitoxan kenê ke şêrê serê sindoqan. Yê teberê bajarî zî wa bêrê raya xo bierzê. Serkewtiş nizdî yo.”