Gulîstan Gulmuş

 

XARPÊT - Namzeta hemşaredarîye ya Depî Songul Duzgune seba weçînayîşê herêmî ke rojek ci rê mendo venga şarî kerd. Songul Duzgune da zanayîş ke do qezaya Depî bikerê bajarê cinîyan û wina vat: “Ma venga cinîyan kenê ke wayîrê îradeyê xo bivejê. Wa şêrê serê sindoqan û raya xo bierzê. Wa bi raya xo wayîrê sindoqan bivejê. 

 

Weçînayîşê herêmî yê 31ê Adare rê yew roje mend. Xarpêt de şar seba weçînayîşî amade yo. Xebatê weçînayîşî yê DEM Partî bê maben dewam keno. Namzetê DEM Partî ke a roje bi şarî û cinîyan reyde têkilî de bî, dîyar kerdê ke waştişê înan no yo ke şar wayîrê îradeyê xo bivejîyo. Namzeta hemşaredarîye Songul Duzgune da zanayîş wexto ke şaredarî bigîrê do seba cinîyan raşte akerê û venga wayîrvejîyayîşê rayan û sindoqan kerd. 

 

Songule bale ant serê prosesê weçînayîşî û eşkera kerd ke nê prosesî de tewr zêde cinîyan ra paştî girewtê û sebebê ci zî namzetê hemşaredarîye yê cinî bîyî hêvî. Songule wina dewam kerd: “Serkêşî û serkewtişê nê têkoşînî do reyna bi cinîyan pê bêro. Tena cinîyê DEM Partî nê heme cinî pozîtîf nizdî bîyî. Bîyayîşê sîstemê hemserekatîye zaf weş o. Bi serran camêrdan temsîl kerd. La DEM Partî ca da cinîyan. Temsîlkarîya cinîye bî hêvî.”

 

 ‘Ma wayîrê ameyoxê xo vejîyenê’ 

 

Songule seba weçînayîşo ke do roja yewşeme pê bêro veng kerd û vat: “Ma venga cinîyan kenê û şarê xo kenê ke wayîrê îradeyê xo bivejêne. Wa her kes şêro serê sindoqan û rayê xo bierzo. Wa wayîrê sindoqan bêro vejîyayîş. Ma do pîya ser bikewê. Ma bawer kenê. Ma do çîyê aîdê xo tepîya bigîrê.”