DÊRSIM - Namzeta hemşaredarîya Dêrsimî Bîrsen Orhane veng kerd ke ganî şarê Dêrsimî wayîrê îradeyê xo bivejîyo û wina vat: “Xeylê rayî eşkenê xeylê kayan bixerepnê. Ma şarê Dêrsimî dawetê serê sindoqan kenê. 

 

Weçînayîşê herêmî yê 31ê Adare rê yew roje mend. Prosesê xebatê weçînayîşî de mîtîng, bername, zîyaretê şarî, konvoyî pê ameyî. Bajaran de ber bi ber xebatî ameyî rayîr ra berdiş. Dêrsim de zî xebatê DEM Partî bêmaben dewam kerd. Namzeta hemşaredarîye ya Dêrsimî Bîrsen Orhane dîyar kerd ke weçînayîşê rê yew roje mend û veng kerd ke ganî şarê Dêrsimî wayîrê îradeyê xo bivejîyo û raya bierzo.

 

 ‘Bawerî bi partîye tam a’ 

 

Bîrsen Orhane da zanayîş ke prosesê weçînayîşî de hetê şarî ra eleqeyêk pîl dîyî û wina dewam kerd: “Şarê Dêrsimî hem tîfaqê Dêrsimî û hem zî namzetê DEM Partî bi coş pêşwazî keno. Berê xo ma rê akerdê. Ma şîyî verê berê înan, bawerîya xo ya bi ma vatî. Pratîkê ma yê verê ra şar bi ma bawer o. Şar wextê Songul Erola ke 2004î de dest pêkerd ra û heta wextê Edîbe Şahîn û Nurhayat Altunî qala xebatê înan keno. Bi coşêke pîl ma pêşwazî kerdê.” 

 

‘Ercê Dêrsimî pawenê’ 

 

Bîrsene vat ke cinîyê Dêrsimî waştişê ‘Dêrsim biresnêne erc û kodê verê cu’ û wina ercnayîş kerd: “Cinî wazenê ke tutê înan polîtîkayê asîmîlasyon û torê tîryakî ra xelas bibê. Wazenê bi taybetî koçberî bêro vindarnayîş. Wazenê yê ke koçber bîyê tepîya agêrê bajarê xo. Dêrsim bi destê cinîyan ameyo awankerdiş. Tarîkat, cemaetî nê bajarî de xebatan rayîr ra benê. Çîyo ke ma ra yeno waştiş no yo ke erce Dêrsimî bêrê pawitiş.”

 

‘Seba awankerdişê newî ra bêrê raya xo bierzê’ 

 

Bîrsene qiseykerdişê xo wina qedêna: “Dêrsim de xeylê kayî est ê. Ma vanê ke ‘rayêke do xeylê kayan bixerepno’. Ma şarê Dêrsimî dawetê serê sindoqan kenê. Kesê ke teberê Dêrsimî de ciwîyenê ganî bêrê raya xo bierzê. Ma heme kesî dawet kenê. Seba newîye ra awankerdişê Dêrsimî ma coşê 8ê Adare bi ruhê Newroze rê kerd yew û ma do 1ê Nîsane de bi serkewte tacîdar bikerê.”