QERS - Hacere da zanayîş ke weykerdişê kazê ke çimeyê îdareyê aye yê, dimayê 25 serran krîzê ekonomîye vera mecbur menda fek ci ra vera bida û vat: “Yemê kazan zaf vay o. Ma nêeşkenê weye bikerê.” 

 

Netîceyê polîtîkayê şer ê îqtîdarê AKPyî de krîzê ekonomîye her ke şî pîl bî û heto ke tewr zêde mexdur bî cinî ya. Krîz her ca de citkarî û weyekerdişê heywanan qedêna û hemwelatijê ke îdareyê xo bi çinitiş û weyekerdişê heywanan kerdêne vera enflasyonê berzî de têkoşîn kenê. Yew çimeyê îdareyî yê esas ê Qersî weyekerdişê kazan o. La krîzê ekonomîye vera ameyo merheleya çinîbîyayîşî. Hacer Yurullî ke 25 serrî kazan weye kerd, krîzê ekonomîye vera fek karê xo ra vera da. 

 

Dimayê 25 serran fek karê xo ra vera da 

 

Hacare da zanayîş ke 25 serrî taxa xo de kazan weye kerda û vayeya yem vera 2022yî de karê înan ameyo merheleya çinîbîyayîşî û mecbur menda fek vera bida. Hacere wina vat: “Ma mecbur mendê fek karê weyekerdişê kazan ra vera bidê. Yew zaf vaye yo. Ma prosesê pandemî de ameyî na merhela. Ma nêeşkayî yem bigîrê. Dormeyê keyeyê ma de raşteyê veng, şîn est bî. Kaz şîyêne uca de çerayêne. La no raşte zî kêm bî. Bî beton. Cayê kazan nêmend ke şêrê çêrênayîş.” 

 

Wextê hakan û qupkewtişî

 

Hacere qala weyekerdişê kazan kerd û vat: “Kazî peynîya aşma sibate de hakan kenê. Ma o wext cemêk ceh, cemêk zî nan dane. Wexto ke ma ceh dayêne kaşikê hakê înan huşk bîyêne û leyîrî nêeşkayêne hakan ra bivejê. Kazî di reyan hakan kenê. Yew aşme na rewşe dewam kena. Dima ra prosesê qupbîyayîşî destpê keno. Roja ke leyîr hake ra vejîyeno çîyêk nîno dayîş. Di rojan ra tepîya şit û dima ra yem û şit yenê dayîş. Dima ke tay pîl benê êm wenê.”

 

‘Raşteyê şîn kêm bî, êm zêde vaye bî’ 

 

Hacere wina qiseykerdişê xo peynî kerd: “Serranê ewilî de wexto ke ma newî dest bi nê karî kerd ameyoxê ma baş bî. La serranê peyênan de krîzê ekonomî û beton bîyayîşê raşteyê şînî vera ma kewtî zehmetî. Karê ma çinî bî. Raşteyê ke kazî şêrê çerênayîş bikerê nêmend. Hem êm vaye bî û hem zî raşteyê şînî kêmî bî. Weyekerdişê kazan zaf zehmet o. Barê ma roj bi roje giran bî. Krîz vera ma mecbur mendî fek karê xo ra vera bidê.”